تاليباندىقتار اۋعانىستاندا ەسىرتكى ءوندىرىسىن قولعا الدى

اۋعانىستاننىڭ بيلىگىندە بولعان جىلدارى كوكنار وندىرىسىنە تىيىم سالعان تاليباندىقتار ەندى ەسىرتكى ءوندىرىسىن ءوز قولدارىنا العالى وتىر. بۇرىندارى كوكنار وسىرىلگەن يەلىكتەرى بار شارۋا قوجالىقتارىنان سالىق الىپ وتىرعان تاليباندىقتاردىڭ ەندى ءوز زاۋىتتارىن سالىپ، حالىقارالىق ەسىرتكى ساۋداسىنا بەل شەشە كىرىسىپ وتىرعانى باتىس ەلدەرى اراسىندا الاڭداۋشىلىق تۋعىزدى. بۇل تۋرالى APF اقپاراتتىق اگەنتتىگى جازدى.

بۇۇ-نىڭ دەرەگىنە سۇيەنسەك، 2016 جىلى اۋعانىستان قۇنى 3 ملرد اقش دوللارى بولاتىن 4,8 مىڭ توننا اپيىن ءوندىرىپ، الەمدىك سۇرانىستىڭ 80 پايىزىن قامتاماسىز ەتكەن.

اقش مەملەكەتتىك حاتشىسىنىڭ كومەكشىسى ۋيليام  براۋنفيلد جۋىردا اۋعانىستان استاناسى كابۋلدا جۋرناليستەرگە بەرگەن سۇحباتىندا: "تاليباندىقتار بۇكىل كوكنار القاپتارىن ءوز قاراماعىنا العانىنا سەنىمدىمىن. وڭاي وسەتىن كوكنار اۋعانىستاننىڭ اۋىل شارۋاشىلىعىنىڭ ەداۋىر بولىگىن قۇرايدى. تاليباندىقتار ەندى سول ءشوپتى ەل ىشىندە وڭدەپ، ساتاتىن بولادى. وڭدەلگەن تاۋار الدەقايدا قىمبات باعالانادى", - دەدى.

ءوز اتىن جاسىرىن ۇستاۋدى ءجون كورگەن باتىس ساراپشىسى جەرگىلىكتى فەرمەرلەر كوكنار تەرىمى ءۇشىن ءار كيلوگراممىنا 163 دوللاردان السا، ايماقتىق نارىقتا گەروينگە اينالعان ەسىرتكى 2300-3500 دوللار ارالىعىندا ساتىلادى. ەۋروپا شەكاراسىنا جەتكەنگە دەيىن 1 كگ تاۋاردىڭ باعاسى4500 دوللارعا جەتەدى.

2016 جىلى اۋعانىستان پوليتسياسى 66 مىڭ توننا گەرويندى مورفينگە اينالدىرۋعا قاجەتتى حيميالىق زاتتى تاركىلەسە، بيىلعى جىلدىڭ العاشقى 6 ايىنىڭ وزىندە قولعا تۇسكەن حيميالىق قوسپالاردىڭ كولەمى - 50 مىڭ توننا. بۇل تاليبانداردىڭ ەسىرتكى ءوندىرۋ جانە وڭدەۋ ءىسىن جولعا قويىپ جاتقانىن كورسەتەدى. اۋعانىستاننىڭ ىشكى ىستەر مينيسترلىگى قاڭتار-ماۋسىم ايلارى ارالىعىندا 46 استىرتىن جۇمىس ىستەيتىن ەسىرتكى فابريكالارىن جاپقان.

ەسىرتكىگە قارسى كۇرەس ءبولىمىنىڭ وكىلى سايد مەحدي كازەميدىڭ پىكىرىنشە، تاليباندىقتار ەسىرتكى وندىرىسىنەن كوپ قارجى تاۋىپ، قارۋ-جاراق جيناپ، ءوزىنىڭ اسكەري قۋاتىن كۇشەيتپەك.

اۋعانىستاننان شالعاي ورنالاسقان كاناداعا جەتكىزىلەتىن ناشانىڭ 90 پايىزى اۋعاندىقتاردىڭ قولىنان شىققان ءونىم ەكەنىن ەسكەرسەك، ەسىرتكى بيزنەسىنىڭ جاندانىپ، قولعا الىنۋى بۇكىل وڭىرگە عانا ەمەس، جالپى الەمگە تونگەن سالماقتى قاۋىپ ەكەنى انىق.

“The Qazaq Times”