فوتو: Getty Images

YouTube الەۋمەتتىك جەلىسى  - ارام پيعىلدى ادامداردىڭ بالالارعا شابۋىل جاساپ، ولارعا تىيىم سالىنعان كونتەنت ۇسىناتىن تانىمال الاڭدارىنىڭ ءبىرى. وسى ماسەلەنى شەشىپ، YouTube قىزمەتىن پايدالاناتىن بالالاردى ولارعا قارسى جاسالاتىن زياندى  ارەكەتتەردەن قورعاۋ ءۇشىن، كومپانيا Trusted Flaggers دەپ اتالاتىن ەرىكتىلەر توبىن قۇرعان. اتالعان سەرۆيستىڭ قىزمەتكەرلەرى جۋىردا BBC اقپاراتتىق اگەنتتىگىنە بەرگەن سۇحباتىندا، "YouTube Trusted Flaggers ەرىكتىلەرى جىبەرگەن شاعىمداردىڭ ەڭ از بولىگىن عانا قاراپ، قالعانىن نازارعا الماي وتىر", -  دەپ مالىمدەدى. 

Trusted Flaggers جەلىدەگى كۇدىكتى كوممەنتتەر مەن جازبالاردى انىقتاپ، سول بويىنشا ەسەپ دايىنداپ وتىراتىن سەرۆيس ءتۇرى. ونىڭ بالالار قۇقىعىن قورعاپ، قاۋىپسىزدىگىن قامتاماسىز ەتۋ ماقساتىندا جۇمىس ىستەيتىنى جوعارىدا ايتىلدى. ەندى اتالعان سەرۆيستە ەڭبەك ەتەتىن ەرىكتىلەردىڭ ايتۋىنشا، بىرنەشە اي بويى كومپانيانىڭ قاراۋىن كۇتىپ جاتقان شاعىمداردىڭ سانىندا ەسەپ جوق. ەرىكتىلەردىڭ ءبىرى  2016 جىلى  جەكە ءوزى 9 مىڭ بايانداما جاساعانىن، بىراق بىردە ءبىرى قارالماعانىن جەتكىزدى.

سوڭعى 60 كۇندە سايتتىڭ ەرەجەلەرىن بۇزادى جانە بالالاردىڭ پسيحيكاسىنا كەرى اسەر ەتەدى دەپ تانىلعان 526 بەينەجازبانىڭ تەك 15-ءى عانا وشىرىلگەن. "بۇل YouTube جەلىسىنىڭ بالالار قاۋىپسىزدىگىنە نەمقۇرايلى قاراپ وتىرعانىن كورسەتەدى" ، - دەيدى ەرىكتىلەر توبى.

Trusted Flaggers قىزمەتى 2012 جىلى قۇرىلدى جانە ونىڭ قۇرامىنا قۇقىق قورعاۋ قىزمەتكەرلەرىنەن باستاپ، قايىرىمدىلىق قورلارىنا دەيىن كىرەدى.

“The Qazaq Times”