ۆەنەسۋەلا پرەزيدەنتى نيكولاس مادۋرو. فوتو: ينوسمي.

ەلدىڭ كونستيتۋتسياسىنا وزگەرىس ەنگىزۋدى ورتاعا قويعاننان كەيىن اقش ۆەنەسۋەلاعا قىسىمدى ارتتىردى. وتكەن اپتانىڭ سوڭىندا ۆەنەسۋەلادا وتكەن كونستيتۋتسيالىق اسسامبلەيا سايلاۋ زاڭدىلىعىن الەمنىڭ كوپتەگەن ەلدەرى مويىنداماي شىقتى. لاتىن امەريكاسىنداعى ەلدەر، مەكسيكا، اقش جانە ەۋروپا ەلدەرى دە قارسى بولسا دا، پرەزيدەنت نيكولاس مادۋرو العان بەتىنەن قايتار ەمەس. اقش جانە ەۋروپا ەلدەرى ونى دارا بيلىككە ۇمتىلدى دەپ ايىپتادى.

«تۇرىك تەلە-راديو» قىزمەتىنىڭ بەرگەن حابارىنا قاراعاندا، نيكولاس مادۋروعا اقش سانكتسيا جاريالاپ ۇلگەرگەن. اقش قازىنا دەپارتامەنتى ونىڭ اقش-تاعى بارلىق يەلىكتەرىنە شەكتەۋ قويىپ وتىر. الداعى ۋاقىتتا كانادا، مەكسيكا، برازيليا، ارگەنتينا تاعى باسقا لاتىن امەريكاسى مەن ەۋروپا ەلدەرى دە سانكتسيا جاريالاپ، ەكونوميكا مەن ديپلوماتيالىق قوس نوقتانى بىردەي سالار بولسا، سانكتسيا قىسىمىندا قالعان ۆەنەسۋەلا پرەزيدەنتى نيكولاس مادۋرو ءوزىنىڭ ازياداعى جاقتاستارىنان قولداۋ سۇراۋى مۇمكىن.

ازىرگە دەيىن ۆەنەسۋەلانى تاباندى تۇردە جاقتاپ تۇرعان رەسەي دەۋگە بولادى. دۇيسەنبى كۇنى ماسكەۋ ەڭ العاشقىلاردىڭ ءبىرى بولىپ، كونستيتۋتسيالىق وزگەرىستى قولدايتىندارىن جاريالادى. ءارى ونىڭ زاڭدىلىعىنا شەك كەلتىرىپ، قولداماي جاتقانداردى، بۇل ەلگە قاراتا ەكونوميكالىق قىسىمدى كۇشەيتكەلى جاتقان ەلدەردى ايىپتادى.

BBC ارناسىنىڭ ساراپتاۋىنشا ماسكەۋ ساياسي جاقتان قولداۋ كورسەتكەنىمەن، ۆەنەسۋەلانىڭ قازىرگى قيىنشىلىعى ءۇشىن وعان قارجىلاي قولداۋ كوبىرەك كەرەك. الايدا، رەسەي ءوزىنىڭ قارجىسىن كەشىرۋمەن شەكتەلۋى مۇمكىن دەگەن بولجام ايتادى. ال، قىتايدا كاراكاستاعى قارىزىنىڭ از بولەگىن كەشىرگەنىمەن، مادۋروعا قارسى توپتارمەن دە بايلانىس ورناتىپ، قارجىسىن ءوندىرىپ الۋعا تىرىسقانى بايقالادى. بۇل مايداندا قىتاي ءوز مۇددەسىن باسا جاقتاپ وتىر.

بۇل ەكەۋىنەن گورى ەكونوميكالىق كومەك ءۇندىستاننان كەلۋى مۇمكىن. سەبەبى، يران مۇناي ەكسپورتى قايتالاي ىسكە قوسىلعانىمەن ءۇندىستان ءالى دە ۆەنەسۋەلا مۇنايىن تاسىمالداپ وتىر. ونىڭ ءوزى سول ەلدىڭ كوپ جىرتىعىن جاماپ كەلەدى. الىستاعى تۋىستان جاقىنداعى كورشى ارتىق دەمەكشى وڭىردەگى جاقتاستارىنىڭ قاتارى كەمىسە ۆەنەسۋەلانىڭ كۇنى قيىنداي تۇسكەلى تۇر.

“The Qazaq Times”