قازاقستاندىقتار كرەديتتىك كارتا بويىنشا دا قارىزدارىن تولەي الماي وتىر

وسى جىلدىڭ ءبىرىنشى جارتى جىلدىعىندا قازاقستاندىق بانكتەر كرەديتتىك كارتالاردى بەلسەندى تۇردە شىعارا باساعان. الايدا وسى قۇرال بويىنشا مەرزىمى وتكەن قارىز كولەمى دە ارتىپ جاتىر. بۇل تۋرالى ءبىرىنشى كرەديتتىك بيۋرو وكىلدەرى حابارلادى.

بكب-نىڭ مالىمەتىنشە، كرەديت نارىعى 2016 جىلعا قاراعاندا ەكى ەسەگە ۇلعايعان. بانكتەر ارقىلى تاعايىندالعان كرەديتتەر ءليميتىنىڭ جالپى سوماسى وسى جىلدىڭ التى ايىندا-اق 38 ملرد تەڭگەگە جەتكەن. ال 2016 جىلدىڭ 12 ايىندا 39 ملرد تەڭگە بولعان. ال كرەديت كارتالارىنىڭ پورتفەلى (قارىز) 45,2 ملرد تەڭگە شاماسىندا، ال قولدانىستا جۇرگەن كارتا سانى 410 مىڭ دانادان اسقان.

بكب اقپاراتىنا سەنسەك، وسى جىلدىڭ التى ايىندا بولشەك كرەديتتەردىڭ جيىنتىق سوماسى 4,81 ترلن تەڭگەگە جەتتى. ال تولەم مەرزىمى 90 كۇننەن اسىپ كەتكەن كرەديتتەردىڭ التى ايداعى ۇلەسى 17,3 پايىزدى قۇرادى. بۇل مامىر ايىنداعى كورسەتكىشكە قاراعاندا 0,6 پايىزعا از، الايدا ءبىرىنشى توقسانمەن سالىستىرعاندا 0,2 پايىزعا جوعارى.

ء"بىز بانك سەگمەنتىندەگى ماركەتينگتىك بەلسەندىلىكتىڭ تومەن بولۋىنا قاراماستان تۇتىنۋشىلاردىڭ ۇسىنىسى مەن سۇرانىسىنىڭ ارتۋىنا بايلانىستى نارىقتا قالىپتى ءوسىم بولادى دەپ بولجاپ وتىرمىز", - دەيدى بيۋرو ساراپشىلارى.

سونداي-اق، بيۋرو وكىلدەرى نارىقتا جالپى كرەديتتەۋ ۇلەسى ارتىپ كەلە جاتقانىن ايتادى.

“The Qazaq Times”