يوردانيادا زورلىقشىلاردى ءوز قۇرباندارىنا ۇيلەنگەنى ءۇشىن جازادان بوساتاتىن زاڭ كۇشىن جويدى

يوردانيادا زورلاۋ فاكتىسى ءۇشىن ايىپتالعانداردى ءوز قۇرباندارىنا ۇيلەنگەن جاعدايدا جازادان بوساتاتىن زاڭ كۇشىن جويدى. بۇل تۋرالى ءال-جازيرا (AL-Jazeera) اقپاراتتىق اگەنتتىگى جازادى. 

2016 جىلدىڭ قازان ايىندا يوردانيا كورولى ابدۋللا II ارنايى كوميتەتكە سوت جۇيەسىن رەفورمالاپ، 1960 جىلدان بەرى كەلە جاتقان قىلمىستىق كودەكستى قايتا قاراۋ تۋرالى تاپسىرما بەرگەن بولاتىن.

وسى تاپسىرمانىڭ اياسىندا، قوعام بەلسەندىلەرىنىڭ پىكىرى ەسكەرىلىپ، قىلمىستىق كودەكستەن زورلاۋ فاكتىسىنە كىنالى ازامات ءوز قۇربانىنا ۇيلەنىپ، ونىمەن ەڭ كەمى 3 جىل بىرگە تۇرعان جاعدايدا، وزىنە تاعىلعان ايىپتاردان بوسايتىنى قاراستىرىلعان 308 باپتىڭ كۇشى جويىلدى.

يوردانياداعى جارتىلاي مەملەكەتتىك  "ايەلدەر ءىسى جونىندەگى ۇلتتىق كوميسسيا" ۇيىمىنىڭ باس حاتشىسى سالما نيمس: "بۇگىن يوردانيا ءۇشىن تاريحي ماڭىزدى كۇن. 308-باپتىڭ قىلمىستىق كودەكستەن الىنىپ تاستالۋى - قۇقىق قورعاۋ ورگاندارى مەن قوعامدىق بىرلەستىكتەردىڭ، مەملەكەت پەن ازاماتتىق قوعامنىڭ بىرلەسكەن جۇمىسىنىڭ ناتيجەسى", - دەدى.

كوپ جىلدار بويى اتالعان باپتى ايەل ادامنىڭ ارىن ساقتاۋداعى ماڭىزدى قۇرال كورەتىندەر مەن ادام قۇقىعى ءۇشىن كۇرەسەتىندەر اراسىنداعى قىزۋ تالقىعا نەگىز بولىپ كەلدى. پارلامەنتتىڭ شەشىمى شىعارىلعانشا، عيمارات سىرتىندا ايەل قۇقىقتارىنىڭ قورعالۋىنا مۇددەلى توپ بەيبىت شەرۋ ۇيىمداستىردى.

ەندى اتالعان شەشىمدى پارلامەنت سەناتى قولداسا، قۇجات يوردانيا كورولى ابدۋللا II قول قويۋىنا جىبەرىلەدى.

وتكەن اپتادا  تۋنيستە دە وسىعان ۇقساس شاراعا تىيىم سالىنىپ، "كەز كەلگەن زورلىق-زومبىلىق ارەكەتى قاتاڭ جازاعا لايىق" دەگەن مالىمدەمە جاسالعان ەدى.

“The Qazaq Times”