فوتو: Zanoza.kg

شىلدەنىڭ 31-ءى كۇنى قىرعىزستاندا قازان ايىنىڭ 15-ىنە بەلگىلەنگەن پرەزيدەنت سايلاۋىنا قاتىسۋشىلاردىڭ قۇجاتتارىن قابىلاۋ مەرزىمى اياقتالدى. بىشكەك قالاسىندا ورنالاسقان ورتالىق سايلاۋ جانە رەفەرەندۋم كوميسسياسى وسى ۋاقىتقا دەيىن 59 ادامنىڭ قۇجاتتارىن قابىلداعان.  

سايلاۋعا قاتىسۋعا ءۇمىت بىلدىرگەن 59 ادامنىڭ تەك 10 عانا پارتيا اتىنان قاتىسۋشىلار. قالعان 49 ادام پرەزيدەنتتىككە ءوزىن ءوزى ۇسىنۋشىلار. ولاردىڭ ىشىندە اقپان ايىنان بەرى «قارجى جىمقىردى» دەگەن كۇدىكپەن قاماۋدا وتىرعان «رەسپۋبليكا» پارتياسىنىڭ كوشباسشىسى ومىربەك بابانوۆ پەن «اتا مەكەن» فراكتسياسىنىڭ باسشىسى ومىربەك تەكەباەۆ بار. بۇل ەكى ۇمىتكەر اتالمىش پارتيالاردى وزدەرى قۇرعان. ولار بيىلعى سايلاۋعا ءوز وزدەرىن ۇسىنۋلارىنىڭ باستى سەبەبىن جاقتاستارىنىڭ قۇقىعىن شەكتەگىلەرى كەلمەيتىندىكتەرىمەن تۇسىندىرگەن. قالعان 47 ءوزىن ءوزى ۇسىنۋشى ۇمىتكەرلەر جايىندا قىرعىزستان حىلقى ەشنارسە بىلمەيدى. ويتكەنى ولاردىڭ باسىم كوپشىلىگى وزدەرى قۇرعان پارتيالاردىڭ اتىنان سايلاۋعا قاتىسۋشىلار. قازىرگى تاڭدا قىرعىزستاندا 100-گە جۋىق پارتيا بار ەكەنىن ەسكەرسەك، قىرعىز حالقىنىڭ ولاردى تانىماۋى زاڭدىلىق ەكەنىن تۇسىنۋگە بولادى.

ال ەلگە تانىمال پارتيالاردان «اتا جۇرت» پارتياسى بيىلعى سايلاۋعا بىردەن ەكى كانديداتىن ۇسىنعان. ولار قامشىبەك تاشيەۆ پەن احماتبەك كەلدىبەكوۆ. پارتيالار اتىنان سايلاۋعا قاتىسۋشىلاردىڭ ىشىندە سايلاۋدا جەڭىسكە جەتۋگە مۇمكىندىگى باسىم «قىرعىزستان دەموكراتيالىق پارتياسىنىڭ» مۇشەسى سوورونباي جەەنبەكوۆ، «اق-شۋمكار» پارتياسىنان تەمىر ساريەۆ جانە «ونۋگۋ-پروگرەسس» پارتياسىنىڭ مۇشەسى باقىت توروباەۆتار بار.

جالپى العاندا سايلاۋعا قاتىسۋشىلار اراسىندا ومىربەك تەكەباەۆ پەن سادىر جاپپاروۆ قازىرگى ۋاقىتتا «جەمقورلىق» بابى بويىنشا تۇرمەدە وتىر. تاعى ءبىر ۇمىتكەر ەكس-سپيكەر احماتبەك كەلدىبەكوۆ بۇرىن سوتتالعان. ال «قىرعىزستان» پارلامەنتى فراكتسياسىنىڭ اتىنان سايلاۋعا تۇسكەن قاناتبەك يساەۆ ۇستىنەن جاقىندا قىلمىستىق ءىس قوزعالعان.

پرەزيدەنتتىككە ۇمىتكەرلەردىڭ ەڭ ۇلكەنى ەكس-دەپۋتات مۇقار چولپونباەۆ 67 جاستا. ەڭ كىشىسى رومان رەمنەۆ 35 جاستا. سايلاۋعا قاتىسۋشى 59 كانديداتتىڭ ىشىندە 6 زەينەتكەر مەن 6 جۇمىسسىز ادام بار.

ەستەرىڭىزگە سالايىق، قىرعىزستاندا بۇعان دەيىنگى پرەزيدەنت سايلاۋى 2011 جىلى وتكىزىلگەن. ول كەزدە ورتالىق سايلاۋ جانە رەفەرەندۋم كوميسسياسىنا 83 ادام قۇجاتتارىن تاپسىرىپ، ولاردىڭ 16-سى عانا كوميسسيا ىرىكتەۋىنەن وتكەن بولاتىن. 2011 جىلعى سايلاۋدا المازبەك اتامباەۆ 62 پايىز داۋىس جيناپ جەڭىسكە جەتكەن ەدى.

“The Qazaq Times”