"سولتۇستىك كورەيانىڭ نەگىزگى ماقساتى - اقش-تىڭ جەرىنە جاڭىلماي جەتىپ، قۇلايتىن يادرولىق وقتۇمسىقتاردى دايىنداۋ. 28 شىلدە كۇنى سىناقتان وتكىزىلگەن "حۆاسون-14" قۇرلىقارالىق بالليستيكالىق زىمىرانى كحدر-دىڭ ءوز ماقساتى جولىندا ۇلكەن جەتىستىكتەرگە قول جەتكىزگەنىن كورسەتەدى", - دەپ جازادى CNN اقپاراتتىق اگەنتتىگى.

بۇۇ مەن الەمنىڭ بىرنەشە مەملەكەتىنەن سان ءتۇرلى ەسكەرتۋلەر العانىنا قاراماستان، سولتۇستىك كورەيا وسى ۋاقىتقا دەيىن يادرولىق قارۋىن سىناقتان وتكىزىپ كەلدى. اقش وزىنە قارسى ۇشىرىلعان زىمىرانداردىڭ سىناعىنان  نەنى ۇيرەنىپ، قانداي ساباق الدى؟ بۇل تۋرالى بۇكىلالەمدىك قاۋىپسىزدىك باعدارلاماسىنىڭ جەتەكشىسى، "الاڭداۋلى عالىمدار وداعىنىڭ" مۇشەسى David Wright-تىڭ پىكىرىن ۇسىنامىز.

"28 شىلدە كۇنى ۇشىرىلعان زىمىران سولتۇستىك كورەيانىڭ ۇزاق قاشىقتىقتارعا جەتەتىن قارۋى بارىن دالەلدەدى. عالىمداردىڭ جۇرگىزگەن ەسەبى بويىنشا، 2 مىڭ 300 كم  بيىكتىكتە ۇشقان زىمىران ستاندارتتى تراەكتوريامەن قوزعالسا، اقش-تىڭ باتىس جاعالاۋىنا جەتىپ، چيكاگو، بوستون، ءتىپتى نيۋ-يورككە سوققى بەرۋى مۇمكىن. بىزدە زىمىراننىڭ سيپاتتاماسى تۋرالى تولىق مالىمەت جوق، دەگەنمەن قولدا بار اشىق دەرەكتەرگە قاراپ، سولتۇستىك كورەيا ۇزاق قاشىقتىققا جىبەرىلەتىن زىمىراندار جاساۋدا كوش ىلگەرىلەگەن دەگەن قورىتىندى شىعارۋعا بولادى. زىمىراننىڭ قۋاتى ءىرى اسكەري بازالاردى جويىپ جىبەرە الماسا دا، قالالاردى قيراتۋعا قاۋقارى جەتەدى".

ءساۋىر ايىندا ۇشىرىلعان ءۇش زىمىراننىڭ  ساتسىزدىگى اقش-تىڭ رەسمي وكىلدەرى تاراپىنان "كحدر-دا تەحنيكالىق ماسەلەلەردى شەشۋ بويىنشا بىرقاتار قيىندىقتار بار" دەگەن قورىتىندى شىعارۋعا مۇمكىندىك بەرگەن ەدى. دەگەنمەن، ونىڭ سوڭعى اسكەري قۋاتىن كورسەتەتىن دەمونستراتسيالارى الياسكا مەن گاۆاي ارالدارىنا جەتەتىن زىمىراندار ءوندىرىسىنىڭ جاقسى جولعا قويىلعانىن كورسەتتى. كورشىلەس وڭتۇستىك كورەياداعى اقش-تىڭ اسكەري بازاسى مەن جاپونيانىڭ جاعالاۋىنا ايتارلىقتاي زاردابىن تيگىزۋگە قابىلەتتى زىمىرانداردىڭ سىناماسى دا الەم جۇرتشىلىعىنىڭ كوز الدىندا جۇزەگە استى. امەريكا ۇكىمەتىنىڭ "سولتۇستىك كورەيانىڭ ارەكەتىنە الەم بولىپ، توسقاۋىل قويۋ قاجەت", -  دەپ، بارلىق مەملەكەتتى قىسپاققا الىپ جاتقانى دا، ونىڭ وزىنە ءتونىپ وتىرعان قاۋىپتى ايقىن سەزىنگەندىگىنەن سياقتى.

“The Qazaq Times”