قر پرەمەر-ءمينيسترى باقىتجان ساعىنتاەۆ پەن قاراعاندى وبلىسىنىڭ اكىمى ەرلان قوشانوۆ. فوتو: karaganda-region.gov.kz

قاراعاندى وبلىسىنىڭ اكىمى ەرلان قوشانوۆ قر پرەمەر-ءمينيسترى باقىتجان ساعىنتاەۆپەن وتكەن جينالىستا وبلىستا جۇزەگە اسىرىلاتىن جوبالار تۋرالى ايتىپ، ولارعا ۇكىمەت تاراپىنان قولداۋ كورسەتۋدى سۇرادى. بۇل تۋرالى وبلىس اكىمدىگىنىڭ ءباسپاسوز قىزمەتى حابارلادى. 

ونىڭ سوزىنشە، قاراعاندى وبلىسىندا كلينيكالىق ەمحاناعا جاڭا عيمارات قاجەت.

"قازىرگى نىساننىڭ بولىمدەرى 1940-60 جىلدارى سالىنعان جانە زاماناۋي تالاپتارعا ساي كەلمەيدى. قازىر 300 ورىنعا شاقتالعان جاڭا كوپپروفيلدى اۋرۋحانا قۇرىلىسىنىڭ سمەتالىق قۇجاتتارى ازىرلەنىپ جاتىر. جەر اۋماعى ءبولىندى. رەسپۋبليكالىق بيۋدجەتتەن 3 جىلعا قاراجات ءبولۋدى قاراستىرۋدى سۇرايمىن. تاعى ءبىر قوردالانعان ماسەلە – وبلىستىق ونكولوگيالىق ديسپانسەرگە جاڭا وتا جاساۋ بولىگى قاجەت. قۇرىلىستىڭ قۇنى جوبامەن – 2,5 ملرد تەڭگە. بۇل ماسەلەنى شەشۋدە دە مەملەكەتتەن كومەك سۇرايمىز", - دەدى ەرلان قوشانوۆ.

سونداي-اق، اكىمنىڭ ايتۋىنشا، قاراعاندى وبلىسىندا الەۋمەتتىك تۇرعىن ۇيلەر، مادەنيەت جانە بيزنەس نىساندارىن سالۋ جوسپارى بار. الايدا جىلۋ قۋاتىنىڭ جەتكىلىكسىزدىگىنەن ونى جۇزەگە اسىرۋ مۇمكىن بولماي وتىر ەكەن. ءۇشىنشى جەس تالاپ ەتىلەتىن كولەممەن قامتاماسىز ەتۋگە دايىن، تەك تاسىمالداۋ ءۇشىن 2 شاقىرىم جىلۋ قۇبىرلارىن سالۋ قاجەت. ول الەۋمەتتىك، اكىمشىلىك نىسانداردى جانە قالانىڭ جاڭا اۋدانىن جىلۋمەن قامتاماسىز ەتۋگە مۇمكىندىك بەرەدى. جوبا قازىر ازىرلەنۋدە. قاجەت ەتەتىن ينۆەستيتسيا سوماسى - 12 ميلليارد تەڭگە.

بۇدان بولەك، ەرلان قوشانوۆ  بىرقاتار ەلدى مەكەندەردى اۋىز سۋمەن قامتاماسىز ەتۋ ماسەلەسىن دە كوتەرگەن.

ايتا كەتەيىك، ەرلان قوشانوۆ ايتقان ماسەلەلەر تەك قاراعاندى وبلىسىندا عانا ەمەس. ءار وبلىستا سۋ تاپشىلىعى، ەمحانالاردىڭ جەتىسپەۋشىلىگى، جول ماسەلەلەرى جەتىپ ارتىلادى. ال ولاردىڭ الدىن الىپ، رەتتەپ جاتقان ۇكىمەت وكىلدەرى ساۋساقپەن سانارلىق. تەك "قۇرعاق" ەسەپ بەرۋدەن جاڭىلمايمىز.

“The Qazaq Times”