فوتو: Reuters

كاتاردىڭ كولىك جانە كوممۋنيكاتسيا مينيسترلىگى جانە اۆياتسيا وكىلدەرى ساۋد ارابياسى، بىرىككەن اراب امىرلىكتەرى، باحرەين مەن ەگيپەتتىڭ توتەنشە جاعدايلار كەزىندە دوحانىڭ اۋە جولدارىن اشۋعا رۇقسات بەرۋ تۋرالى شەشىمى جالعان دەپ مالىمدەدى. بۇل تۋرالى اقپاراتتى ءال-جازيرا (Al-Jazeera) تەلەارناسى تاراتتى. 

ساۋد ارابياسىنىڭ  SPA اقپاراتتىق اگەنتتىگى جەكسەنبى كۇنى كاتارعا قارسى وداق قۇرعان ءتورت اراب مەملەكەتى 1 تامىزدان باستاپ، توتەنشە جاعدايلار كەزىندە اۋە جولدارىن اشۋ  تۋرالى شەشىم قابىلدادى دەپ جاريالادى. بەرىلگەن دەرەكتە "جەرورتا تەڭىزى ۇستىنەن وتەتىن ءبىر حالىقارالىق اۋە كەڭىستىگى مەن 9 اۋە ءدالىزى" اشىلادى دەلىنگەن.

كاتار بيلىگى اراب ەلدەرىن مونترەالدا وتەتىن كەزدەسۋ الدىندا مۇنداي جالعان اقپاراتتار تاراتپاۋعا شاقىردى.

“The Qazaq Times”