فوتو: Reuters

اقش بۇۇ-نىڭ قاۋىپسىزدىك كەڭەسىندە سولتۇستىك كورەيانىڭ سوڭعى وتكىزگەن زىمىران سىناعىنا قاتىستى تالقىلاۋ اشۋدىڭ ەش ماڭىزدىلىعى جوق ەكەنىن ەسكەرتتى. ويتكەنى مۇنداي ءسوز جۇزىندەگى كەزدەسۋلەردىڭ كوپتىگىن سولتۇستىك كورەيا الەمدىك قاۋىمداستىق ونىڭ ارەكەتتەرىن ايىپتاپ وتىرعان جوق دەپ ءتۇسىنۋى مۇمكىن. 

اقش-تىڭ بۇۇ-داعى ەلشىسى نيككي حەيلي : "سولتۇستىك كورەيامەن كەلىسسوزدەر جۇرگىزۋدىڭ، بۇل تاقىرىپ اياسىندا سويلەسە بەرۋدىڭ ۋاقىتى ءبىتتى. ناقتى ءىس-ارەكەتەرگە كوشۋ كەرەك", - دەپ مالىمدەدى.

سولتۇستىك كورەيا وسى ۋاقىتقا دەيىن بۇۇ-نىڭ ەسكەرتۋلەرىنە قاراماستان، بىرنەشە دۇركىن زىمىرانداردىڭ سىناقتارىن وتكىزىپ، اقش-تىڭ بارلىق قالالارى ولاردىڭ قارۋلى نىساناسىندا ەكەندىگىن دالەلدەدى. وعان جاۋاپ رەتىندە كورەي جارتىتۇبەگىندە بىرنەشە اسكەري جاتتىعۋلار مەن سىنامالار وتكىزگەن امەريكا ەندى پحەنياندى بۇكىل الەمنەن وقشاۋلاپ، وعان قىسىم كورسەتۋدىڭ امالىن جۇزەگە اسىرۋعا بار كۇشىن سالىپ وتىر. جۋىردا جاپونيانىڭ پرەمەر ءمينيسترى سيندزو ابە مەن  دونالد ترامپ اراسىندا وتكەن كەزدەسۋدەگى ەكونوميكالىق شەكتەۋلەر تۋرالى كەلىسسوزدەر - وسىنىڭ ايعاعى.

نيككي حەيلي قىتاي بيلىگىن كحدر مەن اقش اراسىندا تاڭداۋ جاساۋعا شاقىردى. سولتۇستىك كورەيامەن ساۋدا بايلانىستارىن ءالى دە بولسىن ۇزبەي وتىرعان قىتايدىڭ ارەكەتى امەريكانىڭ اشۋىنا تيگەنگە ۇقسايدى. ويتكەنى وسى مالىمدەمەدەن بۇرىن دونالد ترامپ ءوزىنىڭ تۆيتتەر پاراقشاسىندا اقش-پەن ساۋدادان ميللياردتاعان قارجى تاۋىپ وتىرعان قىتاي سولتۇستىك كورەيانىڭ قارۋلى باعدارلاماسىن توقتاتۋعا ەشقانداي كۇش سالماعانىنا نارازى ەكەندىگىن جازعان ەدى.

“The Qazaq Times”