BBC اقپاراتتىق اگەنتتىگى ءسۇريادا "يسلام مەملەكەتى" لاڭكەستىك ۇيىمىنىڭ قاتارىندا بولىپ، كەيىننەن جيحادشىلاردىڭ قولىنان قاشىپ قۇتىلعان ايەلدەر تۋرالى رەپورتاج دايىندادى. العاش رەت كامەرا الدىندا حاليفات قاتارىنا نەگە قوسىلعاندارىن بۇكپەسىز بايانداعان ايەلدەر ءالى دە تەرروريستەردىڭ جانىندا ءومىر ءسۇرىپ جاتقاندارعا، "بۇل ارەكەت سەندەردى ۋادە ەتىلگەن جۇماققا اپارمايدى" دەگەن ۇندەۋ جولدادى.

بۇل ايەلدەر الەمنىڭ ءارتۇرلى بۇرىشىنان كەلگەنىمەن، حاليفاتقا قوسىلۋ تۋرالى ءبىر ماقسات ولاردى بىرىكتىرگەن. كۇردى اسكەرىنىڭ كومەگىمەن قازىر سوعىس الاڭىنان تىس ايماقتا بالالارىمەن ءومىر ءسۇرىپ جاتقان ايەلدەردىڭ ومىرلىك سەرىكتەرىن سول "ارمان بولعان" حاليفاتتىڭ مۇشەلەرى ولتىرگەن. تىنىش تۇرمىسىن، بەيقام ءومىرىن تاستاپ، نەگە سۇرياعا جول تارتقانىن كوپ جەسىردىڭ ءبىرى بىلاي تۇسىندىرەدى: ء"بىز تۇراتىن تۋنيستە ايەلدەر اشىق كيىنەتىن، باستارىن ورامالمەن بۇركەمەيتىن. ال ءبىز ناعىز يسلام شارتتارىن قاتاڭ ساقتايتىن قوعامدا ءومىر سۇرگىمىز كەلدى.  "يسلام مەملەكەتى" ۇيىمى تۋرالى دەرەكتەر قارادىق.   ءبىر بەينەجازبادان ۇرلىق جاساعانى ءۇشىن قولى كەسىلگەن ازاماتتى كوردىك. ناعىز ادىلدىك، ءدىن قاعيداتتارىنا بەرىك مەملەكەت ەكەن دەگەن جالعان وي قالىپتاستى. ول كەزدە "يسلام مەملەكەتى" سودىرلارىنىڭ حالىققا كورسەتكەن وزبىرلىعى نە ادامداردى ولتىرگەنى تۋرالى بەينەجازبالار از بولاتىن".

سۇحبات بەرۋشىلەردىڭ مالىمدەۋىنشە، ولاردىڭ ءار كۇنى بالالارى مەن كۇيەۋلەرىنىڭ ومىرىنە الاڭداۋمەن وتكەن. "قورقىنىشقا تولى كەز كەلگەن ءتۇنى ولار ۇيگە باسا كوكتەپ كىرىپ، كۇيەۋلەرىمىزدى ءولتىرىپ كەتەتىن. "يسلام مەملەكەتى" تۋرالى نارازى پىكىر ايتقان ايەل تۇرمەگە جابىلاتىن", -دەيدى اۋىر ازاپ ارقالاعان  نازىك جاندىلار.

بۇل بەينەجازباداعى نەگىزگى اقپاراتتى قازاق تىلىنە اۋدارۋ ارقىلى وقىرماندارىمىزعا تەرروريزمنىڭ قاۋىپتىلىگىن، جالعان اقپارات جەتەگىندە ء"دىن ءۇشىن كۇرەسكەرلەردىڭ" قاتارىن تولىقتىرامىن دەگەن ويدىڭ سالدارى اۋىر ەكەندىگىن تاعى دا ءبىر ەسكەرتكىمىز كەلەدى.

“The Qazaq Times”