شەكاراداعى قىتاي جانە ءۇندىستان اسكەرلەرى. فوتو: South China Morning Post.

قىتاي مەن ءۇندىستان اراسىنداعى كىربەڭدىك ۋشىعىپ تۇر. بۇنىڭ باستى سەبەبى، ەكى ەلدىڭ وڭىردەگى مۇددە قايشىلىعىنىڭ تەكە-تىرەسكە ءتۇسۋى. ءۇندىستان مەن قىتاي اراسىندا ەكىجاقتى كەلىسىمگە قول جەتكىزە الماعان شەكارا سىزىعى دا ءبىر شاما كوپ. سوندىقتان دا ەكى ەل اراسىندا شەكارالىق داۋ-داماي ءجيى تۋىپ كەلەدى. قىتايدىڭ وڭتۇستىك-شىعىس جانە وڭتۇستىك ازياداعى ىقپال كولەمىنىڭ ارتۋى دا ءۇندىستان مەن قىتاي اراسىنا جاڭا قايشىلىقتار الىپ كەلدى.

24 شىلدە كۇنى قىتاي قورعانىس مينيسترلىگىنىڭ رەسمي مالىمدەمەشىسى ۋ شيەن ارناۋلى ءباسپاسوز كونفەرەنتسياسىندا: «الداعى ۋاقىتتا قىتاي جاق ءۇندى-قىتاي شەكاراسىنداعى اسكەري وقۋ-جاتتىعۋلارىن كۇشەيتەدى»، – دەپ مالىمدەدى. ونىڭ ايتۋىنشا بۇنداي اسكەري وقۋ-جاتتىعۋلار  قىتاي ەگەمەندىگى مەن تەرريتوريا تۇتاستىعىن قورعاۋ ءۇشىن كەرەك بولىپ وتىر ەكەن.

South China Morning Post  سايتىنىڭ جازۋىنشا، اتالعان كونفەرەنتسيادا ۋ شيەن: «ءۇندىستاننىڭ شەكارا اۋماعىنداعى جاساپ وتىرعان ارەكەتتەرى شەكتەن شىعۋدا. ءبىز ولارعا قۇر قيالعا سالىنباۋدى قاتاڭ ەسكەرتەمىز. گاز جەتكىزۋدى نەمەسە وزگە دە سىلتاۋلاردى العا تارتىپ ءبىر تاۋدى تەسۋ قيىن ەمەس، الايدا قىتاي ازاتتىق ارمياسىن جەڭۋ قيىن»، – دەگەن. ول تاعى ءبىر سوزىندە: «ءۇندىستان ۇكىمەتى بايسالدى قادامدار جاساپ، جاسالعان قاتەلىكتەرىنەن ۋاقىتىندا باس تارتۋى كەرەك. ەكى ەل اراسىندا قاۋىپسىزدىكتى قورعاۋ ءۇشىن پروۆوكاتسيالاردى توقتاتۋى ءتيىس»، – دەگەن ەسكەرتۋىن جاسادى.

وسىعان دەيىن دە قىتاي قورعانىس مينيسترلىگى ءۇندىستان قارۋلى كۇشتەرىن شەكارا ىشىنە قاراي شەگىندىرۋىن تالاي مارتە ەسكەرتكەن بولاتىن.

“The Qazaq Times”