سولتۇستىك كورەيا تاعى دا الەمدى دۇرلىكتىرگەلى وتىر

وسىعان دەيىنگى حالىقارالىق قات-قابات قارسىلىقتارعا قاراماستان، سولتۇستىك كورەيا الداعى ۋاقىتتا جاڭا بالليستيكالىق زىمىران سىناعىن جاساۋعا دايىندالىپ وتىر، دەپ حابارلايدى الەمدىك اقپارات كوزدەرى. كحدر-نىڭ ءار رەتكى زىمىران سىناعىنان كەيىن، كورەي تۇبەگىندە سوعىس تۋىلۋ قاۋىپى ەسەلەپ ارتا تۇسەدى. اسىرەسە، سوڭعى 4 شىلدەدە بولعان زىمىران سىناعى كەزىندە اقش سولتۇستىك كورەياعا ەڭ سوڭعى قاتاڭ ەسكەرتۋىن جاساعان بولاتىن.

اقش-تىڭ CNN ارناسىنىڭ حابارىنا قاراعاندا، سولتۇستىك كورەيا الداعى ۋاقىتتا قۋاتى مەن ولشەمى بەيمالىم زىمىران سىناعىنا كۇشتى دايىندىقتار جاساۋدا. بۇل "4 شىلدەدەگى قۋاتتى زىمىران سىناعىنىڭ جالعاسى" دەيدى اقش اقپارات كوزدەرى.

مۇنى سولتۇستىك كورەيانىڭ زىمىران سىناعى تاريحىندا ەڭ تابىستى بولعان زىمىران سىناعى دەۋگە بولادى. سەبەبى، سول رەتكى بالليستيكالىق زىمىراننىڭ ۇشۋ ارالىعى مەن ۇشۋ ۋاقىتى جانە نىساناعا دالدىگى جاعىنان جاڭا بەلەسكە كوتەرىلدى. بۇل كحدر-نىڭ اقش تەرريتورياسىنا يادرولىق قارۋدى جەتكىزۋگە قابىلەتتى بولعانىن كورسەتتى. ۇشۋ ارالىعى بۇرىنعى سىناقتارعا قاراعاندا 933 ەسەگە ارتىپ، 2 مىڭ 802 شاقىرىمعا 39 مينۋتتا ۇشىپ جەتكەن.

ەگەر الداعى ۋاقىتتا سولتۇستىك كورەيا زىمىران سىناعىن قايتالايتىن بولسا، وندا كورەي تۇبەگىنىڭ جاعدايىن ناقتى بولجاپ ايتۋ قيىنعا سوعادى. وسىعان دەيىن اقش تەڭىز جانە اۋە كۇشتەرىن تۇبەككە قاراي جاقىنداتىپ، قىر كورسەتكەنىمەن پيوڭياڭعا (پحەنيان) توسقاۋىل بولا المادى. ەندىگى جەردە اقش باياعى بوپسالاۋدى جالعاستىرا ما، الدە، ناقتى اسكەري ارەكەتكە بارا ما – بۇل الداعى زىمىران سىناعىندا بەلگىلى بولادى.

“The Qazaq Times”