فوتو: تسەنزور.نەت

دانيانىڭ ۆايلە قالاسىندا تەررورلىق شابۋلعا قاتىسى بار دەگەن كۇدىكپەن وزبەكستان ازاماتى ۇستالدى، دەپ حابارلايدى Eltuz.com اقپارات كوزى.

تۇركيا بيلىگىنىڭ وتىنىشىمەن دانيادا وسى جىلدىڭ باسىندا ستامبۋل قالاسىنىڭ «Reina» تۇنگى كلۋبىندا بولعان لاڭكەستىك شابۋىلعا قاتىسى بار دەگەن كۇدىكپەن يبراگيمجون اسقاروۆ ەسىمدى ازامات تۇتقىندالعان. تۇركيا بيلىگى ونى «Reina» كلۋبىنا شابۋىل جاساعان تاعى ءبىر وزبەكستان ازاماتى ابدۋكادىر ماشاريپوۆتى قارۋ-جاراقپەن قامتاماسىز ەتىپ وتىرعان» دەپ ايىپتاپ، دانيا قۇقىق قورعاۋ ورگاندارىنان تۇركياعا ەكستراديتسيالاۋلارىن سۇراعان.

جەرگىلىكتى باق وكىلدەرىنىڭ مالىمەتىنشە، اسقاروۆتى بۇعان دەيىن لاڭكەستىك ۇيىمدارعا قاتىسى بار دەگەن كۇدىكپەن دانيا پوليتسياسى بىرنەشە رەت قاماۋعا العان. بىراق دالەلدەردىڭ جەتىسپەۋىنە بايلانىستى بوساتىپ جىبەرۋگە ءماجبۇر بولعان.

الايدا بۇل جولى تۇركيا قۇقىق قورعاۋ ورگاندارى اسقاروۆتىڭ «يسلام مەملەكەتى» لاڭكەستىك ۇيىمىنىڭ بەلدى مۇشەسى ەكەنىن، ونىڭ «Reina» تۇنگى كلۋبىنا شابۋىل جاسالعان كۇنى ستامبۋلدا  بولعانىن دانيا بيلىگىنە دالەلدەپ شىققان. وسىعان بايلانىستى يباگيمجون اسقاروۆ تەرگەۋ جۇمىستارى اياقتالعانشا 4 اپتاعا قاماۋعا الىنعان.

ەستەرىڭىزگە سالايىق، 2017 جىلدىڭ باسىندا ستامبۋلدىڭ «Reina» تۇنگى كلۋبىنا بەلگىسىز ازامات باسىپ كىرىپ، عيمارات ىشىندەگى ادامدارعا اۆتوماتتان وق جاۋدىرعان. سالدارىنان 39 ادام كوز جۇمىپ، 69 ادام جاراقات العان.

“The Qazaq Times”