قازاقستاندىقتار ۇشاقپەن ءجيى ۇشاتىن بولعان

2017 جىلدىڭ 6 ايىندا جولاۋشىلاردى اۋە كولىگىمەن تاسىمالداۋ 18,7%-عا وسكەن. وسىلايشا كورسەتكىش وتكەن جىلدىڭ ءبىرىنشى جارتىجىلدىعىمەن سالىستىرعاندا 500 مىڭ ادامعا ارتقان. بۇل تۋرالى قر ينۆەستيتسيالار جانە دامۋ مينيسترلىگى مالىمدەدى. 

2017 جىلعى جارتى جىلدىقتا بارلىعى 3,2 ملن ادام اۋە كومپانيا قىزمەتتەرىن پايدالاندى. نۇرسۇلتان نازارباەۆ حالىقارالىق اۋەجايىنىڭ اقپاراتى بويىنشا، وتكەن جىلدىڭ ءبىرىنشى جارتىجىلدىعىمەن سالىستىرعاندا حالىقارالىق باعىتتار بويىنشا جولاۋشىلار تاسىمالى 46%-دى (2016 جىلى – 113514 جولاۋشى، 2017 جىلى – 165435 جولاۋشى) جانە ىشكى رەيستەردە 24%-دى (2016 جىلى – 190979 جولاۋشى، 2017 جىلى – 237309 جولاۋشى) قۇرادى.

2016 جىلى اۋەجاي 3,5 ملن جولاۋشىعا قىزمەت كورسەتكەن. 2017 جىلعى جارتى جىلدىقتا – 1,8 ملن جولاۋشىعا قىزمەت كورسەتىلگەن. جىل باسىنان بەرى شەتەلدىك جانە قازاقستاندىق اۋە كومپانيالار 9 جاڭا حالىقارالىق باعىتتى اشتى.

مينيسترلىكتىڭ مالىمەتىنشە، «اشىق اسپان» شەڭبەرىندە استانا – حەلسينكى، استانا – ۆارشاۆا، استانا – بۋداپەشت، استانا – بەيجىڭ، استانا – كيەۆ، استانا – باتۋمي، استانا – نيۋ-دەلي، استانا – ەرەۆان، استانا – مينەرالنىە ۆودى رەيستەرى اشىلدى. قازاقستانعا پولشالىق LOT, ۆەنگريالىق لوۋكوستەر Wizz Air, فيندىق Finnair, قىتايلىق Air China سياقتى جاڭا اۋە تاسىمالداۋشىلارى كەلدى.

“The Qazaq Times”