تۇركيادا توتەنشە جاعداي ۇزارتىلدى

تۇركيا پارلامەنتى وتكەن جىلعى مەملەكەتتىك توڭكەرىس جاساۋعا تالپىنىس وقيعاسىنان كەيىن ءتورتىنشى رەت ەلدە توتەنشە جاعداي رەجيمىن تاعى دا ءۇش ايعا ۇزارتىپ وتىر. بۇل تۋرالى تۇركيانىڭ HürriyetDailyNews باسىلىمى حابارلادى.

پارلامەنت دەپۋتاتتارىنىڭ پىكىرىنشە، توتەنشە جاعدايدى ۇزارتۋ تۋرالى شەشىم تەرروريستىك قاۋىپ-قاتەردىڭ الدىن-الۋ ماقساتىندا قابىلدانعان. مۇندا ءبىرىنشى كەزەكتە فەتحۋللاح گيۋلەن باسقاراتىن فەتو ۇيىمى تۋرالى ءسوز بولىپ وتىر.

ەستەرىڭىزگە سالا كەتەيىك، 2016 جىلدىڭ 15-نەن 16 شىلدەگە قاراعان ءتۇنى تۇركيادا مەملەكەتتىك توڭكەرىس جاسالماق بولعان. وقيعا سالدارىنان 265 ادام قازا تاپقان بولاتىن. تۇركيانىڭ پرەزيدەنتى رەجەپ تايىپ ەردوعان بۇل بۇلىكتى فەتحۋللاح گيۋلەن ۇيىمداستىرىپ، پەنسيلۆانيادان تىكەلەي بۇيرىق بەرىپ وتىرعان دەپ ەسەپتەيدى.

تۇركيانىڭ وپپوزيتسيا تاراپىنداعى رەسپۋبليكالىق حالىقتىق پارتياسى توتەنشە جاعدايدى ۇزارتا بەرۋ ەل ەكونوميكاسى مەن ساياسي بەدەلىنە نۇقسان كەلتىرۋى مۇمكىن دەپ الاڭدايدى.

جۋىردا تۇركيا 2 مىڭعا جۋىق قازاقستان ازاماتىنا حالىقارالىق تەرروريزممەن بايلانىسى بار جانە تۇرىك مەملەكەتى ارقىلى قاقتىعىس الاڭدارىنا ءوتۋى مۇمكىن دەگەن ايىپپەن  ەلگە كىرۋگە تىيىم سالدى. تۇركيانىڭ سىرتقى ىستەر مينيسترلىگىنىىڭ مالىمەتىنشە، ازاماتتارىنا ەلگە كىرۋگە تىيىم سالىنعان تىزىمدە قازاقستان 8-ورىندا تۇر (1914 قازاقستاندىق تۇرىك مەملەكەتىنە بارا المايدى).

“The Qazaq Times”