يسپانيا كاتالونيانىڭ تاۋەلسىزدىگىنە توسقاۋىل قويۋ ءۇشىن بارلىعىن جاسايدى

يسپانيا كاتالونيانى كونستيتۋتسيالىق سوتقا بەرەدى. بۇل تۋرالى شەشىم مادريدتە 4 شىلدە كۇنى كاتالونيانىڭ سۋۆەرەنيتەتىن جاقتاۋشىلار وڭىرلىك پارلامەنتتە يسپانيادان تاۋەلسىزدىگىن الۋ تۋرالى رەفەرەندۋمنىڭ زاڭ جوباسىن تانىستىرعاننان كەيىن قابىلداندى. اتالعان زاڭ جوباسىندا "رەفەرەندۋم جەڭىسكە جەتكەن جاعدايدا، كاتالونيا يسپانيادان تاۋەلسىزدىگىن 48 ساعات ىشىندە جاريالايدى" دەلىنگەن.

كاتالونيانىڭ جەرگىلىكتى باسقارۋ ورگانىنىڭ پرەزيدەنتى كارلەس پۋچدەمونت ورتالىق بيلىكتىڭ قارسىلىعىنا قاراماستان، رەفەرەندۋم 2017 جىلدىڭ 1 قازانىندا وتەدى دەپ حابارلادى. يسپانيانىڭ نەگىزگى زاڭى كونستيتۋتسيادا مۇنداي رەفەرەندۋمدار وتكىزۋگە تىيىم سالىنىپ، ونى بۇزعان ازاماتتارعا ارنايى جازا قاراستىرىلعانىمەن كاتالوندىقتارعا بۇل توقتاۋ سالا الماي وتىر. كاتالونيانىڭ باسشىسى تاۋەلسىزدىك العاننان كەيىن ەلدەگى ەكونوميكالىق جاعداي جاقسارا تۇسەتىنىنە سەنىمدى. وسى تۇستا اتاپ ءوتۋ كەرەك، قازىردىڭ وزىندە كاتالونياداعى ازاماتتاردىڭ ورتاشا تابىس مولشەرى يسپانيانىڭ قالعان اۋداندارىمەن سالىستىرعاندا 20 پايىزعا جوعارى.

الەۋمەتتىك زەرتتەۋلەر ورتالىعىنىڭ قىزمەتكەرى  گابريەلا روسپيدەنىڭ مالىمەتىنشە، كاتالونياداعى تاۋەلسىزدىكتى قولداپ، داۋىس بەرەتىندەردىڭ سانى شامامەن 40 پايىزعا دا جەتپەيدى. ال جەرگىلىكتى بيلىك بۇل كورسەتكىش 55 پايىزدان جوعارى دەپ مالىمدەدى.

يسپانيا بيلىگى سەپاراتيستەرگە زاڭعا سايكەس كونستيتۋتسيالىق سوت ارقىلى قارسى تۇرماق. ەلدى بولشەكتەۋگە قاتىستى كەز-كەلگەن يدەيا انتيكونستيتۋتسيالىق دەپ تانىلىپ جانە بۇل ارەكەتتەرى ءۇشىن رەفەرەندۋمعا قاتىسۋشىلار تۇرمەگە توعىتىلۋى مۇمكىن.

“The Qazaq Times”