inosmi.ru

«امەريكالىق ازاماتتىق بوستاندىق وداعى» قۇقىقتىق ۇيىمى (ACLU) اقش پرەزيدەنتى دونالد ترامپتى، ۆيتسە پرەزيدەنت مايك پەنس پەن مەملەكەت باسشىسى قۇرعان ادىلەتتى سايلاۋ بويىنشا كوميسسيانى سوتقا بەردى.

اتالعان ۇيىم پرەزيدەنت جانە ونىڭ جارلىعىمەن ارەكەت ەتۋشىلەردى اقش-تا وتكەن پرەزيدەنت سايلاۋىنا قاتىستى زەرتتەۋلەردىڭ اشىق تۇردە جۇرگىزىلمەگەندىگىنە  جانە بىرقاتار زاڭنامالاردىڭ بۇزىلعانىنا نارازى.

ەستەرىڭىزگە سالا كەتەيىك، وسىدان بۇرىن اقش پرەزيدەنتى دونالد ترامپ سايلاۋ كەزىندە وتە كوپ زاڭبۇزۋشىلىقتار مەن ادىلەتسىزدىكتەر بولدى دەپ، پرەزيدەنتتىك قىزمەتىنە كىرىسكەننەن كەيىن، ءجىتى زەرتتەۋ جۇرگىزىپ، كىنالىلەردى انىقتاۋعا ۋادە ەتكەن بولاتىن. ءتىپتى، «حيلاري كلينتونعا ميلليونعا جۋىق بوسقىنداردىڭ داۋسى بەرىلگەن، ولاردى مۇلدە ەسەپكە الماۋ كەرەك»  دەگەن ەدى.

ترامپتىڭ باستاماسىمەن قۇرىلعان «ادىلەتتى سايلاۋ بويىنشا كوميسسيا» وسى ولقىلىقتاردى تەكسەرىپ، اق-قاراسىن اجىراتادى دەپ كۇتىلگەنىمەن، ءالى كۇنگە اشىق مالىمەتتەر نە دەرەكتەر قوعام نازارىنا ۇسىنىلماي وتىر. ACLU ۇيىمى وسى ماسەلەنى العا تارتىپ، پرەزيدەنتتەن ءوزى بەرگەن ۋادەنى ورىنداۋدى تالاپ ەتتى.

جالپى، دونالد ترامپ پرەزيدەنت اتانعان از ۋاقىتتىڭ ىشىندە ءوزىنىڭ الدىندا قىزمەتتە بولعان اقش پرەزيدەنتتەرىمەن سالىستىرعاندا، 3 ەسە كوپ سوتقا شاقىرىلعان. Boston Globe باسىلىمىنىڭ زەرتتەۋىنە سۇيەنسەك، دونالد ترامپتىڭ اتىنا اقش پرەزيدەنتى لاۋازىمىنداعى العاشقى 100 كۇندە-اق 134 شاعىم تۇسسە، مۇنداي كورسەتكىش باراك وبامانىڭ بۇكىل قىزمەت جىلدارىندا نەبارى 26-نى قۇرايدى. ودان الدىڭعى پرەزيدەنتتەر بيلل كلينتون 15 رەت، دجوردج بۋش 7 رەت سوت مىنبەرىنەن كورىنگەن.

“The Qazaq Times”