پۋتينگە قاستاندىق جاساماقشى بولعان قازاقستان ازاماتى كەشىرىم سۇرادى

رەسەي پرەزيدەنتى ۆلاديمير پۋتينگە قاستاندىق ۇيىمداستىرعان قازاقستاندىق يليا پيانزين ودان كەشىرىم سۇرادى.

33 جاستاعى قازاقستان ازاماتى يليا پيانزين 2013 جىلى رەسەي پرەزيدەنتى ۆلاديمير پۋتينگە قاستاندىق ۇيىمداستىرعانى ءۇشىن 10 جىلعا باس بوستاندىعىنان ايىرىلعان بولاتىن.

پيانزين كەشىرىم حاتىندا پۋتيننەن «قاستاندىق جەكە سىزگە باعىتتالعان سوڭ. كەشىرىمدى دە جەكە وزىڭىزدەن سۇراۋدى ءجون كوردىم» - دەگەن. بىراق ءپيانزيننىڭ پۋتينگە جازعان حاتى پرەزيدەنتكە جەتەدى مە، جەتپەيدى مە ول جاعى ازىرگە بەلگىسىز. سەبەبى ول كەشىرىم حاتتى ءبىرىنشى يليا پيانزين جازاسىن وتەپ جاتقان №26 كالونيا باسشىلىعى مەن سامارا وبلىسى گۋبەرناتورىنا قاراستى ارنايى كوميسسيا قارايتىن بولادى.

ەستەرىڭىزگە سالايىق يليا پيانزين 2012 جىلى رەسەيدە تىيىم سالىنعان «يمارات كاۆكاز» تەررورلىق ۇيىمىنا مۇشە شەشەنستان ازاماتتارى ادام وسماەۆ جانە رۋسلان ماداەۆپەن بىرىگىپ ۆلاديمير پۋتينگە قاستاندىق جاساماقشى بولعان.

2012 جىلدىڭ قاڭتار ايىندا ماداەۆ قولدان جاسالعان جىرىلعىش زاتتى سىناقتان وتكىزۋ بارىسىندا كوز جۇمىپ، پيانزين جاراقات الىپ اۋرۋحاناعا تۇسكەن. ال وسماەۆ قاشىپ كەتكەن ەدى. كەيىنەن وسماەۆ پەن ءپيانزيندى ۋكراينانىڭ ودەسسا قالاسىندا جاسىرىنىپ جۇرگەن جەرلەرىنەن جەرگىلىكتى پوليتسيا قىزمەتكەرلەرى ۇستاپ قاماۋعا العان بولاتىن.

2012 جىلى ۋكراينا ۇكىمەتى ءپيانزيندى رف سۇراۋى بويىنشا رەسەيگە ەكستراديتسيالاپ، ول رف قىلمىستىق كودەكسىنىڭ 277, 209, 222 جانە 223 باپتارى بويىنشا كىنالى دەپ تابىلىپ 10 جىلعا باس بوستاندىعىنان ايىرىلعان بولاتىن. ال وسماەۆ ەۋروپانىڭ ادام قۇقىقى جونىندەگى سوتىنا ارىز جازىپ، سوت ۋكرايناعا وسماەۆتى ساياسي سەبەپتەرگە بايلانىستى رەسەيگە بەرمەۋ جونىندە ۇكىم شىعارعان. وسىدان كەيىن ودەسسا قالاسىنىڭ سوتى ادام وسماەۆتى زاڭسىز قارۋ ساقتاعانى ءۇشىن 2 جىل 9 اي 14 كۇنگە سوتتاعان بولاتىن.

“The Qazaq Times”