فوتو: AFP

يراكتىڭ پرەمەر-ءمينيسترى حايدەر ال-ابادي اسكەريلەردى ەلدەگى ەكىنشى ەڭ ۇلكەن قالا سانالاتىن موسۋلدىڭ  "يسلام مەملەكەتى" لاڭكەستىك ۇيىمىنىڭ سودىرلارىنان ازات ەتىلۋىمەن قۇتتىقتادى. 

"يسلام مەملەكەتى" موسۋل قالاسىن 2014 جىلدىڭ ماۋسىم ايىندا باسىپ العان. وسىدان سوڭ دجيحادشىلار يراك پەن ءسۇريانىڭ كوپ بولىگىن جاۋلاپ الىپ، "حاليفات" جاريالادى.

يراك اسكەرلەرى موسۋل ءۇشىن كۇرەستى 2016 جىلدىڭ 17 قازانىنان باستاپ جۇرگىزىپ كەلدى. سوعىس ءورتى شارپىعان قالادا ميلليونعا جۋىق ادام باسپاناسىنان ايىرىلىپ، ساۋلەتتى عيماراتتار ۇيىندىلەرگە اينالدى.

يراك اسكەرىنىڭ ايتۋلى جەڭىسى  "يسلام مەملەكەتى " لاڭكەستىك ۇيىمى ءۇشىن ورنى تولماس سوققى بولعانى بەلگىلى. ويتكەنى ۇلكەن اۋماقتى قول استىندا ۇستاپ، ءبىرتۇتاس مەملەكەت قۇرۋ يدەياسىن جۇزەگە اسىرۋدا تەرريتوريادان ايىرىلۋ لاڭكەستىك ۇيىم مۇشەلەرىن  السىرەتۋدىڭ ءبىر جولى.

 “The Qazaq Times”