فوتو: Reuters

ۆەنگريا ۇكىمەتىنىڭ باستاماسىمەن ەلدە ءجۇرىپ جاتقان امەريكالىق قارجىگەر جانە فيلانتروپ دجوردج سوروسقا قارسى كامپانيا الەمدىك قاۋىمداستىق تاراپىنان قاتاڭ سىنعا ءىلىنىپ وتىر. بۋداپەشت پەن ۆەنگريانىڭ وزگە قالالارىندا قوعامدىق ورىندارعا ىلىنگەن 86 جاستاعى دجوردج سوروستىڭ كۇلىپ تۇرعان سۋرەتىنىڭ ۇستىنە "وعان سوڭعى بولىپ كۇلۋگە مۇمكىندىك بەرمەڭدەر!" دەپ جازىلعان. 

جەكسەنبى كۇنى "ۆمەستە" دەپ اتالاتىن وپپوزيتسيالىق پارتيانىڭ بەلسەندىلەرى بۋداپەشت كوشەلەرىندەگى سوروستىڭ پلاكاتتارىن الىپ تاستادى. ولار بۇل ءىس-ارەكەتىن ەلدىڭ وزگە قالالارىندا دا جالعاستىرماق.

ۆەنگريانىڭ پرەمەر-ءمينيسترى ۆيكتور وربان دجوردج سوروستى ءىس-ارەكەتتەرى مەن كوزقاراستارى ارقىلى ەۋروپاعا كەلەتىن ميگرانتتار اعىمىن ۇلعايتىپ وتىر دەپ ايىپتاسا، امەريكالىق قارجىگەر ۇكىمەت باسشىسىن مافيانىڭ باسقارۋىنداعى مەملەكەت قۇرىپ وتىر دەپ كىنالايدى.

بۋداپەشتەگى يزرايل ەلشىسى يوسسي امراني جانە ەلدەگى ەۆرەي قوعامىنىڭ وكىلدەرى بيلىكتەن بۇل كامپانيانى شۇعىل ارادا توقتاتۋىن سۇراپ، كەرى جاعدايدا اتالعان كامپانيا  انتيسەميتيزمنىڭ كورىنىسى رەتىندە باعالانۋى مۇمكىن (دجوردج سوروس ۆەنگرياداعى ەۆرەي جانۇياسىندا دۇنيەگە كەلگەن) دەپ مالىمدەدى.

گەرمانيانىڭ ەۋروپا ىستەرى بويىنشا مەملەكەتتىك ءمينيسترى ميحاەل روت ۇيىمداستىرىلىپ وتىرعان كامپانيا تۋرالى ايتۋعا ءسوز تابا المايتىنىن جەتكىزىپ، نارازىلىعىن ءبىلدىردى.  دەگەنمەن ۆەنگريا ۇكىمەتى الەم ەلدەرى مەن باسشىلارىنان كەلگەن سىن-پىكىرلەرگە ءالى جاۋاپ بەرگەن جوق.

اعىمداعى جىلدىڭ ماۋسىم ايىندا ۆەنگريا پارلامەنتى شەت ەلدەن قارجىلاندىرىلاتىن ۇكىمەتتىك ەمەس ۇيىمداردى قاداعالاۋدى كۇشەيتۋ تۋرالى زاڭ قابىلدادى. ۆيكتور وربان بۇل وزگەرىستى :  "سىرتتان قارجى الىپ وتىرعان ۇيىمدار ەلدىڭ ىشكى ىسىنە ارالاسىپ وتىر" - دەپ ءتۇسىندىردى. ءبىرىنشى كەزەكتە، مۇنداي ايىپتاۋلار سوروس قارجىلاندىراتىن ۇيىمدارعا تاعىلعان بولاتىن.

ودان بۇرىن ۆەنگريانىڭ پرەزيدەنتى يانوش ادەر ەلدەگى ۇلتتىق ۋنيۆەرسيتەتتەردى قارجىلاندىرۋشى شەت ەلدىك ۇيىمنىڭ تىركەلگەن ەلىندە وقۋ ورتالىعى بولۋىن تالاپ ەتەتىن زاڭ قابىلدادى. وسى زاڭعا سايكەس، اقش-تا تىركەلگەنىمەن، وندا جۇمىس ىستەيتىن وقۋ ورتالىعى جوق دجورد سوروستىڭ ۆەنگرياداعى ورتالىق ەۋروپا ۋنيۆەرسيتەتى (CEU) جابىلۋى مۇمكىن.

 “The Qazaq Times”