فوتو: ۆۆس.

تۇركيانىڭ ستامبۋل قالاسىندا ەل پرەزيدەنتى رەجەپ تايىپ ەردوعان ۇكىمەتىنە قارسى شەرۋ بولدى دەپ حابارلايدى ۆۆس اقپارات قىزمەتى.

«ادىلدىك مارشى» دەپ اتالاتىن شەرۋ ەل استاناسى انكارادا 15 ماۋسىم كۇنى باستالىپ، ەرەۋىلگە قاتىسۋشىلار 400 شاقىرىم جاياۋ جول ءجۇرىپ ستامبۋل قالاسىنىڭ ورتالىق الاڭىنا دەيىن بارعان.

فوتو: ۆۆس.

شەرۋدى تۇركيا حالىقتىق رەسپۋبليكالىق پارتياسى ۇيىمداستىرعان. پارتيا باسشىسى كەمال كلىچتاروگلۋنىڭ ايتۋىنشا، ەرەۋىلدى ۇيىمداستىرۋداعى باستى سەبەپ، پارتيا مۇشەسى ەنيس بەربەروگلۋنىڭ جازىقسىزدان-جازىقسىز 25 جىلعا سوتتالۋى جانە مىڭداعان ادامنىڭ سەبەپسىزدەن جۇمىستان قۋىلۋى بولعان.

ال ەل پرەزيدەنتى رەجەپ تايىپ ەردوعان تۇركيا حىلىقتىق رەسپۋبليكالىق پارتياسىنىڭ بۇل ءىسىن شەكتەن شىعۋ دەپ باعالاپ، ولاردى تەرروريستىك ۇيىمدارمەن بايلانىستارى بار دەپ ايىپتاعان.

ەستەرىڭىزگە سالايىق، پارلامەنت دەپۋتاتى ەنيس بەربەروگلۋ سۇريامەن شەكارالىق ايماقتا تۇركيا بارلاۋ قىزمەتىنە تيەسىلى جۇك كولىكتەرىن ءتىنتۋ جونىندە باق وكىلدەرىنە ايتىپ بەردى دەپ ايىپتالىپ، 25 جىلعا باس بوستاندىعىنان ايىرىلعان بولاتىن.

ال بىلتىر ەلدە مەملەكەتتىك توڭكەرىس جاساماقشى بولدى دەگەن كۇدىكپەن تۇركيا بويىنشا 140 مىڭ ادام جۇمىستان شىعارىلىپ، 50 مىڭنان استام ادام قاماۋعا الىنعان ەدى.

 “The Qazaq Times”