ماسكەۋ دەلەگاتسيا جىبەرۋگە دايىن ەكەنىن ايتتى. فوتو: Los Angeles Times

رەسەي اسكەرى ۋراينا جەرىندە اسكەري شابۋىلدار جۇرگىزىپ جاتقاندا پۋتين قىتاي باسشىسى شي جينپىڭمەن تەلەفون ارقىلى سويلەسكەن. ءارى، بۇل سويلەسۋ كەزىندە پرەزيدەنت پۋتين ۋكراينامەن جوعارى دەڭگەيدە كەلىسسوز وتكىزۋگە دايىن ەكەنىن بىلدىرگەن.

بۇل مالىمەتتەردەن بۇرىن ۋكراينا پرەزيدەنتى ۆلاديمير زەلەنسكي مالىمدەمە جاساپ، رەسەي پرەزيدەنتى ۆلاديمير ءپۋتيندى كەلىسسوزگە شاقىرىپ، بەيبىت حالىقتىڭ زارداپ شەگۋىن توقتاتۋعا شاقىرعان ەدى. وندا ول ۋكراينانىڭ بلوكتارعا قوسىلماۋ مارتەبەسى بويىنشا كەلىسسوز وتكىزۋ جونىندە ايتادى.

قىتايدىڭ رەسمي اقپارات اگەنتتىگىنىڭ حابارىندا، بۇگىن تۇستەن كەيىنگى (25 اقپان) تەلەفونداعى ديالوگتا پۋتين مەن سي ۋكرايناداعى قاقتىعىس بويىنشا پىكىر الماسقان. پۋتين سوزىندە ۋراينا ماسەلەسىنىڭ تاريحي ءمانى مەن ماسكەۋدىڭ ۇرىستاعى جانە جالپى جاعداي بويىنشا ۇستانىمدارىن ايتقان.

قىتايدىڭ رەسمي تەلە ارناسى تاراتقان حاباردا پۋتين اقش پەن ناتو-نى «رەسەيدىڭ زاڭدى قاۋىپسىزدىك ماسەلەلەرىنە ۇزاق ۋاقىت بويى ءمان بەرمەدى،  بىرنەشە رەت مىندەتتەمەلەردەن باس تارتتى» جانە «رەسەيدىڭ ستراتەگيالىق تۇبەگەيلى دەڭگەيىنە كۇمان كەلتىرە وتىرىپ، شىعىسقا اسكەري ورنالاستىرۋدى ۇزدىكسىز ىلگەرىلەتتى»، – دەپ ايىپتاعان.

وسى حاباردان كەيىن كرەملدىڭ ءباسپاسوز قىزمەتى دە مالىمدەمە جاساپ، زەدەنسكيدىڭ ۇسىنىسىنا ساي ماسكەۋ تارابى بەلارۋسقا دەلەگاتسيا جىبەرۋگە دايىن ەكەنىن ايتتى.

زەلەنسكي ورتاعا سالعان ۋكراينانىڭ بلوكتارعا قوسىلماۋ مارتەبەسى تۋرالى ۇسىنىسى ماسكەۋدىڭ اقش پەن ناتو-دان ىزدەگەن ەڭ ماڭىزدى قاۋىپسىزدىك كەپىلدىكتەرىنىڭ ءبىرى بولىپ كەلگەن  «ناتو-عا قوسىلۋ نيەتىنەن باس تارتۋى» رەتىندە قابىلدانۋدا. اقش پەن ناتو-نىڭ رەسەي تالابىنا كەلىسپەۋى ءپۋتيننىڭ ۋكرايناعا قارۋلى باسىپ الۋ ارەكەتىنە سەبەپ بولعان ەدى.

The Qazaq Times