يراك پرەمەر-ءمينيسترى: «يسلام مەملەكەتى» ۇيىمىنىڭ زاۋال كۇنى جاقىندادى

يراك پرەمەر-ءمينيسترى بەيسەنبى كۇنى جاساعان مالىمدەمەسىندە، «يسلام مەملەكەتى» ۇيىمىنىڭ يراكتاعى اقىرزامانى جاقىنداپ قالدى دەدى. ول يراك ۇكىمەتىنىڭ قارۋلى كۇشتەرى مالىمدەمەسىن العا تارتا وتىرىپ، موسۋل قالاسىنداعى لاڭكەستىك توپتاردىڭ تولىقتاي الاستاتىلعانىن ايتىپ ءوتتى. وسىدان ءۇش جىل بۇرىن «يسلام مەملەكەتى» تەررورلىق ۇيىمى موسۋلدا حاليفات قۇرىلعانىن جاريا ەتكەن بولاتىن. بۇل تۋرالى «The Wall Street Journal» باسىلىمى حابارلاپ وتىر.

دەگەنمەن، «يسلام مەملەكەتى» ۇيىمىنىڭ سودىرلارى يراكتان تولىقتاي الاستاتىلعان جوق. اتالعان تەررورلىق ۇيىم موسۋلدىڭ كەيبىر ورىندارىن ءالى دە ءوز باقىلاۋىندا ۇستاپ وتىر. ال، يراكتاعى كەيبىر شاعىن قالالار تەررورلىق توپتىڭ قاراماعىندا بولىپ كەلەدى. ال، ۇيىمنىڭ ءسۇريا اۋماعىندا باقىلاۋىنا العان تەرريتورياسى الدە قايدا كەڭ. ايتالىق، دەير ەز-زور پروۆينتسياسىنىڭ شىعىس اۋماعى مەن ۇيىمنىڭ ورتالىعى بولىپ وتىرعان راككا قالاسى تەررورلاردىڭ تولىقتاي مەڭگەرۋىندە.

يراك پرەمەر-ءمينيسترى حايدار ءال-ابادي: «موسۋلدىڭ ازات ەتىلۋى اتالمىش ۇيىمنىڭ زاۋال كۇنىنىڭ باستالعانىن بىلدىرەدى. موسۋل قالاسى يراكتىڭ اجىراماس ءبىر بولەگى»، – دەدى. «يسلام مەملەكەتى» ۇيىمى بىرنەشە ەلدەگى قادامدارى ساتسىزدىككە ۇشىراپ، جەڭىلىس تاۋىپ بارعان سايىن اۋقىمىنىڭ تارايىپ بارا جاتقانىنا قاراماستان، الىدە بەلسەندى ارەكەت ەتىپ وتىر. الداعى ۋاقىتتا باعداتتا جانە باتىس ەلدەرىندە تەررورلىق شابۋىلدار كوپتەپ بولۋى مۇمكىن دەپ بولجايدى الەم ەلدەرى ساراپشىلارى.

“The Qazaq Times”