فوتو عالامتور بەتتەرىنەن الىندى.

ESET انتيۆيرۋستىق باعدارلاماۋ جۇيەسىن جاساۋشى كومپانيا قىزمەتكەرلەرى Petya ۆيرۋسىنىڭ تارالۋ كوزىن تاپقانىن مالىمدەدى.

ولاردىڭ دەرەگىنە سايكەس، بەلگىسىز توپ اتالعان ۆيرۋستى M.E.Doc بۋحگالتەرلىك باعدارلاماۋ جۇيەسى ارقىلى تاراتقان. ۋكراينانىڭ كوپ كاسىپورىندارى وسى قارجىلىق باعدارلامالاۋ جۇيەسىمەن جۇمىس ىستەيدى.

ەستەرىڭىزگە سالا كەتەيىك، 27 ماۋسىم كۇنى Petya ۆيرۋسى رەسەي مەن ۋكراينانىڭ كومپيۋتەرلىك جەلىلەرىنە تارالىپ، بارلىعى 80-گە جۋىق كاسىپورىنعا زيان كەلتىرىپ،  جۇمىسىن توقتاتقان بولاتىن. ولاردىڭ قاتارىندا، Mars, Nivea ، «Alpen Gold» شوكولادىن ءوندىرۋشى Mondelez International, «زاپوروجەوبلەنەرگو»، «ۋكرتەلەكوم»، چەرنوبىل  اەس دا بار.

ۆيرۋس كورپوراتيۆتى جەلىگە قاۋىپتى سىلتەمەسى بار حاتتار تۇرىندە تارالعان. زاقىمدالعان كومپيۋتەردەگى دەرەكتەردى دەشيفرلاۋ ءۇشىن حاكەرلەر 300 بيتكوين كولەمىندەگى قارجىنى ارنايى ەسەپ-شوتقا اۋدارۋدى تالاپ ەتكەن. دەگەنمەن جاسىرىن توپ وزدەرىنە قويىلعان تالاپتاردىڭ بارلىعىن ورىنداعان كاسىپورىنداردىڭ دەرەكتەرىن قايتا قالپىنا كەلتىرەمىز دەگەن ۋادەلەرىندە تۇرمادى. ەكى كۇن ىشىندە بارلىعى 45 ترانزاكتسيا ورىندالىپ، حاكەرلەر 10 مىڭ دوللاردان استام قارجىعا يە بولعان.

وسىعان قاتىستى ۋكراينانىڭ مينيسترلەر كابينەتى: «جەرگىلىكتى ماماندار كيبەر شابۋىلدى توقتاتىپ، جاعدايدى باقىلاۋعا الدى»، -دەپ جەتكىزدى.

“The Qazaq Times”