قازاقستان جول جوندەۋگە حالىقارالىق قارجى ينستيتۋتتارىنان قارىز الادى

حالىقارالىق قارجى ينستيتۋتتارىنان بەرىلەتىن 1,8 ملرد دوللار قارىز ەسەبىنەن ۇزاقتىعى 2 184 شاقىرىم بولاتىن 10 جول جوباسى جۇزەگە اسىرىلادى. بۇل تۋرالى قر ينۆەستيتسيالار جانە دامۋ مينيسترلىگىنىڭ مەديا-ورتالىعىندا اۆتوموبيل جولدارى كوميتەتىنىڭ توراعاسى مەرەكە پىشەمباەۆ مالىمدەدى. 

«حالىقارالىق قارجى ينستيتۋتتارىنىڭ (دقحب، ادب، ەقدب، يدب جانە قحر ەكسيمبانكى) زايمدارى ەسەبىنەن  ۇزاقتىعى 2 184 شاقىرىم بولاتىن 10 جول جوباسى ىسكە اسىرۋ باستالادى. ولار: تالدىقورعان – وسكەمەن، كۇرتى –بۋرىلبايتال، مەركى – بۋرىلبايتال، ۇزىناعاش – وتار، قالباتاۋ – ماقات، اتىراۋ –استراحان جانە جەتىباي – جەتىوزەن. قازىرگى تاڭدا قاندىاعاش – ماقات اۆتوجولىنىڭ ۋچاسكەسى بويىنشا ادب زايمى تۋرالى كەلىسىمگە قول قويىلدى. قۇرىلىس جۇمىستارىن بيىل شىلدەدە باستاۋ جوسپارلانىپ وتىر. كۇرتى – بۋرىلبايتال، ۇزىناعاش – وتار، جەتىباي – جەتىوزەن جوبالارى بويىنشا زايمدار تۋرالى كەلىسىمگە قول قويۋ جوسپارلانۋدا. ولاردى راتيفيكاتسيالاۋ اياقتالعاندا كەلىسىم-شارتتارعا قول قويىلادى»،-دەدى مەرەكە پىشەمباەۆ.

سونداي-اق، ول  «نۇرلى جول» ينفراقۇرىلىمدى دامىتۋ مەملەكەتتىك باعدارلاماسى بويىنشا بيىل جوبالاردى جۇزەگە اسىرۋعا 356,2 ملرد تەڭگە بولىنگەنىن اتاپ ءوتتى. ونىڭ ىشىندە جالپى ۇزاقتىعى 1,2 مىڭ شاقىرىم بولاتىن ورتالىق-وڭتۇستىك، ورتالىق-شىعىس، بەينەۋ-اقتاۋ، اقتوبە-اتىراۋ، قاپشاعاي-تالدىقورعان، استانا-پەتروپاۆل جانە ورال-كامەنكا جوبالارىنىڭ قۇرىلىس جۇمىستارىن جالعاستىرۋعا ۇلتتىق قوردان 143,5 ملرد تەڭگە ءبولىندى.

مەرەكە پىشەمباەۆتىڭ ايتۋىنشا، 2017 جىلدىڭ ءبىرىنشى جارتىجىلدىعىندا اتالمىش جوبالاردىڭ  قۇرىلىس-مونتاجداۋ جۇمىستارى جىلدىق جوسپار بويىنشا 32%-عا ورىندالدى.

“The Qazaq Times”