تەررورلىق ۇيىمداردا اسكەري دايىندىقتان وتكەن تمد ازاماتتارى ەلدەرىنە قايتىپ كەلۋدە

تمد ەلدەرىنىڭ لاڭكەستىك ۇيىمداردا اسكەري دايىندىقتان وتكەن 7 مىڭنان استام ازاماتتارى حالىقارالىق ىزدەۋدە دەپ مالىمدەدى تمد لاڭكەستىككە قارسى ورتالىعىنىڭ باسشىسى اندرەي نوۆيكوۆ.

«قازىرگى تاڭدا تەرروريستىك، ەكسترەميستىك قىلمىس جاساعان 7 مىڭنان استام تمد ەلدەرىنىڭ ازاماتتارى حالىقارالىق ىزدەۋدە ءجۇر. ولاردىڭ 2 مىڭى جالدامالى سودىرلار، ياعني بىرنەشە حالىقارالىق تەررورلىق ۇيىمداردىڭ قاتارىندا ءجۇرىپ، الەمنىڭ تۇكپىر-تۇكپىرىندە سوعىسىپ جۇرگەندەر. نەگىزىنەن يراكتا، ءسۇريادا، ليۆيادا، اۋعانستاندا سوعىسىپ جۇرگەندەر رەسەي، قازاقستان، وزبەكستان، قىرعىزستان، ازەربايجان ازاماتتارى. ولار قازىر حالىقارالىق لاڭكەستىك توپتاردا ءتيىستى اسكەري دايىندىقتان ءوتىپ، تمد اۋماعىنا، اتاپ ايتقاندا سولتۇستىك كۆكاز، ازەربايجان، ورتالىق ازيا ەلدەرىندە تەرروريزم وتىن تۇتاندىرۋ ءۇشىن قايتىپ كەلۋدە.» - دەدى اندرەي نوۆيكوۆ بۇۇ-نىڭ قاۋىپسىزدىك كەڭەسىندە وتكەن بريفينگتا.

2010 جىلدان باستاپ وسى ۋاقىتقا دەيىن تمد لاڭكەستىككە قارسى ورتالىعى حالىقارالىق ىزدەۋدە جۇرگەن 1 مىڭ جالدامالى سودىردىڭ قايدا جاسىرىنىپ جۇرگەنىن انىقتاپ، 100 تۇتقىنعا العان. 2016 جىلى لاڭكەستىك ۇيىمدار قاتارىندا سوعىسىپ جۇرگەن تمد ەلدەرىنىڭ 26 ازامات قولعا ءتۇسىپ، لاڭكەستەرگە قارجى اۋدارىپ جۇرگەن 650 جەكە سچەت بۇعاتتالعان.

“The Qazaq Times”