زاۋتبەك تۇرىسبەكوۆ.

بۇگىن استانادا ماۋسىمنىڭ 22-23 كۇندەرى ارالىعىندا وتكەن دۇنيەجۇزى قازاقتارىنىڭ قۇرىلتايى ءوز مارەسىنە جەتتى.

بۇگىن دۇنيەجۇزى قازاقتارىنىڭ قۇرىلتايى استانادا ءوز شىمىلدىعىن جاپتى. قۇرىلتايعا ەلباسى نۇرسۇلتان نازارباەۆ قاتىستى.

قۇرىلتايدا وتە ماڭىزدى الەمدەگى قازاقتاردىڭ تۇيتكىلدى ماسەلەلەرى، ەتنيكالىق قازاقتاردىڭ كوشى-قونى جونىندە ارنايى تاپسىرمالار جاسالدى جانە «وتانداستار» قورى قۇرىلاتىن بولدى.  قۇرىلتايدا نازارباەۆ بۇرىنعىداي ەمەس ەلىمىزدىڭ سولتۇستىگىندە ارنايى رەسمي بەيىمدەۋ ورتالىقتارى جۇمىس ىستەۋ كەرەك ەكەنىن ايتىپ، ءتيىستى ادامدارعا تاپسىرما بەردى.

قۇرىلتاي سوڭىنداعى سايلاۋدا دۇنيەجۇزى قازاقتارى قاۋىمداستىعىنىڭ توراعاسى بولىپ نۇرسۇلتان نازارباەۆ قايتا سايلاندى. ال ونىڭ ءبىرىنشى ورىنباسارى بولىپ زاۋىتبەك تۇرىسبەكوۆ تاعايىندالدى. وسىعان دەيىن 2004 جىلدان بەرى بۇل قىزمەتتى اتقارىپ كەلگەن تالعات ماماشەۆ شەتەلدەگى قانداستاردىڭ، ەل ىشىندەگى ۇلت جاناشىرلارىنىڭ سىنىنا ءجيى ۇشىرايتىن. بۇل ورىنعا شەتتەگى 6 ملن قازاقتىڭ مۇدەسىن قورعاپ ەلگە ورالۋعا ات سالىساتىن بىلىكتى مامان كەرەكتىگى باق - دا ءار كەز كوتەرىلىپ كەلگەن.

دۇنيەجۇزى قازاقتارىنىڭ 5 قۇرىلتايىندا شەتتەگى قازاقتارمەن ەتەنە جۇمىس جاساي الادى دەگەن سەنىممەن نۇرسۇلتان نازارباەۆ مەملەكەت قايراتكەرى، ديپلومات زاۋىتبەك تۇرىسبەكتى ءبىرىنشى ورىنباسارى ەتىپ تاعايىندادى.

زاۋىتبەك تۇرىسبەكوۆ بۇعان دەيىن ۋكراينا، رەسەي، مولدوۆا، وزبەكستان ەلدەرىندە توتەنشە جانە وكىلەتتى ەلشىسى، 2015 جىلدىڭ جەلتوقسان ايىنان باستاپ نۇروتان پارتياسىنىڭ حاتشىسى  قىزمەتىن اتقارعان.

“The Qazaq Times”