رەسەي اقش-پەن جاساسقان اۋە قاۋىپسىزدىك كەلىسىمىن ۋاقىتشا توقتاتتى

اقش اۋە كۇشتەرى ءسۇريا رەجيمىنە تيەسىلى ۇشاقتى اتىپ قۇلاتقاننان كەيىن، رەسەي جاعى اقش-پەن جاساسقان اۋە قاۋىپسىزدىك كەلىسىمىن ۋاقىتشا توقتاتتى. سونىمەن بىرگە، رەسەي ءسىم باسشىسى سەرگەي لاۆروۆ فرانتسيا سىرتقى ىستەر مينيسترىمەن كەزدەسۋ كەزىندە وتكىزىلگەن ءباسپاسوز جيىنىندا ۋاشينگتوننان مالىمدەمە جاساۋدى كۇتەتىندىگىن جەتكىزدى. بۇل تۋرالى «اناتولى» اقپاراتتىق اگەنتتىگى «ريا نوۆوستي» اگەنتتىگىنە سىلتەمە جاساپ حابارلادى.

رەسەي سىرتقى ىستەر ءمينيسترى سەرگەي لاۆروۆ ماسكەۋگە ساپارلاي كەلگەن فرانتسيا سىرتقى ىستەر مينيسترىمەن بىرلەسە ءباسپاسوز ءماسليحاتىن وتكىزدى. جيىندا لاۆروۆ ءسۇريا ۇكىمەتىنە تيەسىلى سوعىس ۇشاعىنىڭ اتىپ قۇلاتىلۋىنا بايلانىستى اقش جاعىنان مالىمدەمە تالاپ ەتەتىنىن ايتتى. سونىمەن بىرگە بۇل ماسەلەلەر وزىنىڭ ارناۋلى كۇن تارتىبىنە قويىلعانىن ايتىپ ءوتتى.

سەرگەي لاۆروۆ سوزىندە: «سۇرياداعى بارلىق تاراپ كۇشتەرى تەررورلارعا قارسى تۇرۋعا جۇمىلدىرۋى ءتيىس. ءار تاراپ ءوز جاۋاپكەرشىلىگىن تانۋى قاجەت. اقش اۋە كۇشتەرىنىڭ ءسۇريا ۇشاعىن قۇلاتۋىنا بايلانىستى مالىمدەمە كۇتەمىز»، – دەپ اتاپ ءوتتى. ەكى ەل اراسىنداعى اۋە قاۋىپسىزدىك كەلىسىمىنىڭ ۋاقىتشا توقتاتىلۋى رەسەي جاقتىڭ الداعى ۋاقىتتا اقش-قا ۇقساس ارەكەتكە دايىندالىپ وتىرعانىن تۇسىندىرەدى.

“The Qazaq Times”