ۇلتتىق بانك تەڭگەنىڭ السىرەۋىنە قاتىستى پىكىر ءبىلدىردى

قازاقستاننىڭ ۆاليۋتا نارىعىنداعى وزگەرىستەر مۇناي باعاسىنىڭ تومەندەۋى سالدارىنان سىرتقى نارىقتاردا قالىپتاسقان جاعدايلارمەن بايلانىستى. مۇل تۋرالى ۇلتتىق بانكتەن حابارلادى. 

ۇلتتىق بانكتىڭ مونەتارلىق وپەراتسيالار دەپارتامەنتىنىڭ ديرەكتورى ءاليا
مولدابەكوۆانىڭ ايتۋىنشا، سوڭعى اپتالاردا مۇناي باعاسىنىڭ ءبىر باررەل ءۇشىن $46 دەڭگەيگە دەيىن جانە ودان  تومەندەۋى نارىقتاعى ۇسىنىستىڭ بولجامدى ارتىقشىلىعىنا قاتىستى بولعان جاڭالىقتار اياسىندا ورىن الۋدا.

ونىڭ ايتۋىنشا، ليۆياداعى مۇنايدىڭ  وندىرىسىنىڭ ۇلعايۋى جانە اقش-تاعى تاقتاتاس مۇناي ءوندىرىسىنىڭ ءوسۋى تۋرالى جاڭالىق نارىقتا ۇسىنىستى تومەندەتۋ بويىنشا وپەك شارالارىنىڭ تابىستى بولۋىنا كۇمان كەلتىرۋگە ءماجبۇر ەتتى.

«نارىقتاعى بولجام بويىنشا، ۇسىنىستىڭ ارتىق بولۋى بولجانعاننان گورى ۇزاعىراق ساقتالادى. وسىلايشا، وپەك كەلىسىمىنىڭ تيىمدىلىگى بارىنشا كۇمان تۋدىرادى»، – دەپ اتاپ ءوتتى ءا. مولدابەكوۆا.

نەگىزگى ىرگەلى فاكتورلاردىڭ ءبىرى رەتىندە مۇناي باعاسىنىڭ وزگەرۋى قازاقستان
تەڭگەسىنىڭ ايىرباستاۋ باعامىندا اسەر ەتىپ وتىر. الايدا ۇلتتىق ۆاليۋتانىڭ السىرەۋى قازاقستاندا عانا ەمەس، ەكونوميكاسى ۇقساس باسقا ەلدەردە دە بايقالىپ وتىر.

" جۇمادان باستاپ تەڭگە 3%، رەسەي ءرۋبلى 4%، كانادا دوللارى
0.6%، برازيليا رەالى 1.1%، نورۆەگيا كروناسى 1.4% قۇلدىرادى", - دەلىنگەن ۇلتتىق بانك حابارلاماسىندا.

رەتتەۋشىنىڭ مالىمەتىنشە، ۇلتتىق بانك ۆاليۋتا نارىعىنداعى احۋالدى قاداعالاۋىن جالعاستىرىپ وتىر جانە ارتىق قۇبىلمالىلىقتى رەتتەۋ جونىندە شارالار قابىلداۋ قۇقىعىن وزىنە قالدىرىپ وتىر.

“The Qazaq Times”