ترامپ جانە شي جينپيڭ. فوتو: The Wall Street Journal.

اقش پرەزيدەنتى ترامپ كحدر-دا قاماۋعا الىنعان امەريكالىق ستۋدەنتتىڭ ولىمىنە بايلانىستى، سولتۇستىك كورەيادان جاۋاپ بەرۋدى قاتاڭ تۇردە تالاپ ەتىپ وتىر. سونىمەن بىرگە ترامپ سەيسەنبى كۇنى سولتۇستىك كورەيانى يادروسىزداندىرۋ ءۇشىن قىتاي ۋادە بويىنشا قىسىمدى ارتتىرۋى ءتيىس ەكەنىن دە ايتتى. بۇعان قوسا اقش-تىڭ ءبىر قاتار جاڭا سىرتقى ساياساتتارىن دا اتاپ ءوتتى. بۇل تۋرالى «The Wall Street Journal» باسىلىمى حابارلاپ وتىر.

ترامپ ءوزىنىڭ Twitter پاراقشاسىندا: «مەن سولتۇستىك كورەيا ماسەلەسىندە جاساعان كومەگى ءۇشىن قحر مەن سول ەلدىڭ باسشىسى شي جينپينگە ايرىقشا راحمەتىمدى ايتقىم كەلەدى. دەگەنمەن، بۇل كۇش بىرىكتىرۋ ونشالىقتى وڭ ناتيجە كورسەتپەدى. سوندىقتان، قىتاي جاقتىڭ سولتۇستىك كورەياعا جاسايتىن قىسىمدى ارتتىرۋىن ءۇمىت ەتەمىن»، – دەپ جازدى.

ەستەرىڭىزدە بولسا، ءساۋىر ايىنداعى قىتاي باسشىسىنىڭ اقش-قا ساپارى كەزىندە ەكى ەلدىڭ كوشباسشىلارى سولتۇستىك كورەيادا يادرولىق جانە زىمىران باعدارلامالارى ماسەلەسىن شەشۋ ءۇشىن بىرلەسىپ جۇمىس ىستەۋگە كەلىسكەن بولاتىن. سوڭعى بىرنەشە اپتادا، امەريكالىق باسىلىمدار ترامپتىڭ Twitter پاراقشاسىندا قىتاي باسشىسىن ماقتاعان لەبىزدەرىن ءجيى كورىپ جۇرگەندەرىن ايتادى. بىراق، سەيسەنبى كۇنگى سوزىندە ەكى ەل كەلىسىمىنىڭ ويداعىداي ىسكە اسپاي جاتقانىن ايتىپ وتىر.

ال، اقۇي مالىمدەمەشىسى شون سپايپەردىڭ جاقىن كۇندەرى بولىپ وتكەن ءباسپاسوز ءماجىلىسىنىڭ بىرىندە ايتقانى،  ترامپتىڭ سوزىنە ءسال قايشى كەلەدى. قىتاي مەن اقش كورەي تۇبەگىن يادروسىزداندىرۋدا انىق سەلبەستىككە قول جەتكىزدى. الدا، سولتۇستىك كورەياعا باعىتتالعان قىسىمدى ارتتىرا تۇسەتىن بولامىز»، – دەگەن بولاتىن. ول تاعى كورەي تۇبەگى ماسەلەسىندە اقش قىتايمەن بولعان سەلبەستىگىن جالعاستىرا بەرەتىنىن ايتتى.

“The Qazaq Times”