ترامپتىڭ كوماندالاستارىن ارنايى پروكۋرور جاپپاي تەكسەرۋگە الدى

اقش-تىڭ «ۆاشينگتون پوست» باسىلىمى، سول جەردىڭ جەرگىلىكتى ۋاقىتىمەن بەيسەنبى كۇنى كەشتە جاريالاعان حاباردا، اقش ارنايى پروكۋرورى روبەرت ميۋللەر، قازىرگى كەزدە پرەزيدەنتى ترامپتىڭ كۇيەۋ بالاسى ءارى جوعارى كەڭەسشىسى دجارەد كۋشنەردىڭ قارجىلىق جانە بيزنەستىك وپەراتسيالارىن تەكسەرۋ ۇستىندە ەكەنىن مالىمدەگەن. ميۋللەردىڭ تەرگەۋىندەگى ماڭىزدى ماسەلەلەردىڭ ىشىندە اقش پرەزيدەنت سايلاۋىنا رەسەيدىڭ كەدەرگى جاساۋ ءىسى دە قامتىلادى.  سونىمەن قوسا ترامپ كومانداسىنىڭ رەسەي وكىلدەرىمەن استىرتىن بايلانىس ورناتۋ ءىسى دە بار.

«ۆاشينگتون پوست» باسىلىمىنىڭ ايتۋىنشا، ميۋللەردىڭ تەرگەۋىنىڭ ءبىر بولەگى – كۋشنەر مەن رەسەي دامۋ بانكىنىڭ باسشسى سەرگەي گوركوۆتىڭ وتكەن جىلى جەلتوقسان ايىنداعى كەزدەسۋى. بۇل كەزدە كۋشنەردىڭ وتباسىلىق جىلجىمايتىن مۇلىك بيزنەسى مانحەتتەندە قارجىلىق كوزدەرىن ىزدەپ جاتقان كەزى بولاتىن.

ءبىر كۋشنەر عانا ەمەس، ترامپتىڭ وزگە دە سەنىمدى جاقتاستارى دا تەرگەۋدى قابىلداۋىنا تۋرا كەلگەن. ءتىپتى الدە قاشان قىزمەتتەن قۋىلعان اقش-تىڭ ۇلتتىق قاۋىپسىزدىك كەڭەسشىسى مايك فلينن دە تەرگەۋ نىساناسىنىڭ ءبىرى. بۇدان وزگە، سايلاۋ ناۋقانى كەزىندەگى كوماندا باسشىسى پاۋل مانافورد جانە بۇرىنعى سىرتقى ساياسات بويىنشا كەڭەسشى كارتەر پەيج دە بار.

قاتىستى ادامداردىڭ سارسەنبى كۇنى اتالعان باسىلىمعا بەرگەن اقپاراتىنا قاراعاندا، ميۋللەردىڭ تەكسەرۋ كولەمى ترامپتىڭ بۇرىنعى بيزنەس سەرىكتەستەرىنە دەيىن كەڭەيگەن.

“The Qazaq Times”