اقش تەڭىز اسكەري فلوتىنىڭ شارلاۋشى كەمەسى. فوتو: The Business Journals.

اقش رەسمي وكىلدەرىنىڭ سارسەنبى كۇنى جاريالاعان حابارىنا قاراعاندا، اقش قورعانىس مينيسترلىگى تەڭىز اسكەري فلوتىن وڭتۇستىك قىتاي تەڭىزىندە اسكەري شارلاۋ جاساۋعا جىبەرگەن. بۇل ترامپ اقش پرەزيدەنت تاعىنا كەلگەلى بەرى العاش رەتكى اتالعان تەڭىز ايماعىنداعى العاش رەتكى اسكەري ارەكەتى بولىپ سانالادى. بۇل تۋرالى “The Wall Street Journal” باسىلىمى حابارلاپ وتىر.

اقش تەڭىز اسكەري فلوتىنىڭ بۇل قيمىلى، قىتاي تاراپىنا جولداعان سيگنالى دەۋگە بولادى. ياعني، اقش تىنىق مۇحيتقا جالعاساتىن ماڭىزدى تەڭىز اۋماقتارىن بوگەتسىز ەتۋگە نيەتتى ەكەنىن اڭعارتىپ وتىر. اقش تەڭىز كۇشتەرىنىڭ وڭتۇستىك قىتاي تەڭىزىندەگى شارلاۋ ارەكەتتەرى بىلتىرعى جىلدىڭ قازان ايىنان بەرى توقتاپ تۇرعان ەدى.

پەنتاگوننىڭ رەسمي مالىمدەمەشىسى بۇل تۋرالى تۇسىنىك بەرۋدەن باس تارتقان. ول تەك: «اقش تەڭىز كۇشتەرى وڭتۇستىك قىتاي تەڭىزىن قامتىعان ازيا-تىنىق مۇحيت وڭىرىندە كۇن سايىن ارەكەتتەر الىپ بارىپ وتىرادى. اقش-تىڭ جاساپ جاتقان ءاربىر ارەكەتى حالىقارالىق قۇقىقتىق نورمالارعا سايكەس، ەشبىر ەلدىڭ مۇددەسىنە قايشى ەمەس»، – دەگەن تۇسىنىكتەمە جاسادى.

قىتاي جاق وزىنە جاقىن تەڭىز الاپتارىندا اقش تەڭىز اسكەري كۇشتەرىنىڭ شارلاۋ جاساپ ءجۇرۋىن قالامايتىنى انىق. بەيجىڭ ترامپ ۇكىمەتىنىڭ جولداعان بۇل سيگنالىنا وڭ قاباق تانىتا الماي وتىر. وسىدان بۇرىن وڭتۇستىك قىتاي تەڭىزىندەگى داۋلى ايماقتار ءۇشىن وبامانىڭ ۇستانعان ساياساتىن ترامپ كومانداسى سىناپ-مىنەپ كەلىپ ەدى. وباما كەزىندە وڭتۇستىك قىتاي تەڭىزىندەگى داۋلى ايماقتارعا ۇشۋ-قونۋ نىساندارىن سالۋ، فورتتار مەن اۋەجايلار ورنالاستىرۋ جوسپارلارىن تۇگەلدەي ايىپتاعان ترامپ كومانداسى قازىر اتالعان داۋلى الاپتارعا وزدەرى دە باس سۇعىپ وتىر.

“The Qazaq Times”