جىلدىڭ العاشقى جارتىسىندا 186 مىڭ ادام جۇمىسپەن قامتىلعان

ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆانىڭ ەسەبىنە سايكەس، ۇستىمىزدەگى جىلدىڭ وتكەن كەزەڭىندە (06.06.17 ج.) جۇمىسپەن قامتۋدىڭ بەلسەندى شارالارىمەن 186 مىڭنان استام ادام قامتىلعان. ونىڭ ىشىندە 91 مىڭ ادام تۇراقتى جۇمىس ورىندارىنا ورنالاستىرىلعان. ال، 74,8 مىڭ ادام كەيىننەن بەلگىلى ءبىر بولىگى تۇراقتى جۇمىسپەن قامتىلاتىنداي جاستار تاجىريبەسى، الەۋمەتتىك جۇمىس ورىندارى مەن قوعامدىق جۇمىستار باعدارلامالارى ارقىلى ۋاقىتشا ەڭبەكپەن قامتىلدى.

2016 جىلى 310,6 مىڭ جاڭا جۇمىس ورىندارى قۇرىلسا، ونىڭ 151,6 مىڭى اۋىلدىق جەردە پايدا بولعان (2017 جىلدىڭ 1 ماۋسىمىنا - تيىسىنشە 105 جانە 44,8 مىڭ). سالالار تۇرعىسىندا ەڭ كوپ جۇمىس ورنى ساۋدا – 37,7  مىڭ، قۇرىلىس – 35,3 مىڭ، ونەركاسىپ – 23,9 مىڭ، اۋىل شارۋاشىلىق – 20,1 مىڭ (2017 جىلدىڭ 1 ماۋسىمىنا – ساۋدا – 14 مىڭ، قۇرىلىس – 16,1 مىڭ، اۋىلشارۋاشىلىق، ورمان جانە بالىق شارۋاشىلىعىندا –  10,3 مىڭ جاڭا جۇمىس ورنى) باعىتتارىندا قۇرىلعان. جالپى جۇمىس ورىندارى كولەمىنەن 65,9% – تۇراقتى جۇمىس ورىندارى بولسا، قالعانى - ۋاقىتشا جانە ماۋسىمدىق سيپاتتا (2017 جىلدىڭ 1 ماۋسىمىنا – 78,2%).

سونىمەن قاتار، جەرگىلىكتى بيۋدجەت ەسەبىنەن جۇمىسپەن قامتۋعا جاردەمدەسۋ شارالارى ىسكە اسىرىلىپ، 2016 جىلى ەلدەگى جۇمىسپەن قامتۋ مەكەمەلەرىنە 336,4 مىڭ جۇمىسسىز ادام كومەككە جۇگىنگەن. بۇل جەردە 66%-دان استامى ەڭبەكپەن قامتىلعان (2017 جىلدىڭ 1 ماۋسىمىنا - 130,2 مىڭ، 39 % جۇمىسقا ورنالاستىرىلعان).

“The Qazaq Times”