كاتار گەلي وندىرەتىن زاۋىتتارىن جاپتى

الەمدە گەلي ءوندىرىسى بويىنشا ەكىنشى ورىنعا يە كاتار ينەرتتى گاز وندىرەتىن كاسىپورىنداردىڭ ءوندىرىسىن توقتاتۋعا ءماجبۇر بولدى. بۇعان كورشى ەلدەردىڭ ەكونوميكالىق بايكوت جاريالاۋى سەبەپ، دەپ حابارلايدى Reuters اقپارات اگەنتتىگى.

كاتار ەلىنە الەمدەگى گەلي ءوندىرىسىنىڭ 25%-ى تيەسىلى. ەلدەگى ءوندىرىس كاسىپورىندارى الەمدى جىلىنا 2 ملرد كۋب فۋت سۇيىق گازبەن قامتاماسىز ەتەدى. مىسالى Qatar Petroleum مەملەكەتتىك مۇناي-گاز فيليالىنىڭ RasGas ۇيىمى ەلدەگى ينەرتتى گاز وندىرەتىن ەكى بىردەي كاسىپورىندى باسقاراتىن. الايدا Reuters اگەنتتىگىنىڭ مالىمەتىنشە، قازىرگى كەزدە بۇل ەكى زاۋىت تا جابىلعان. سەبەبى ساۋد ارابياسى كاتارمەن شەكارانى جاپقاندىقتان، گەلي ەكسپورتى دا توقتاتىلعان.

سونداي-اق، امەريكالىق Kornbluth Helium Consulting فيليالىنىڭ باسشىسى فيل كورنبلۋت كاتارداعى زاۋىتتاردىڭ گەلي ءوندىرىسىن توقتاتقانىن ناقتىلادى. ونىڭ سوزىنشە، بۇل جاعداي الەمدىك گەلي نارىعىنا ازىرگە اسەر ەتە قويعان جوق. تۇتىنۋشىلار نارىقتا بار قوردى پايدالانىپ جاتىر جانە ومان نەمەسە دوحا ارقىلى جەتكىزىلەتىن بالامالى نۇسقالاردى پايدالانۋدا.
سونداي-اق، فيلا كورنبلۋت "ەگەر كاتار مەن وعان كورشى ەلدەر اراسىنداعى قاقتىعىس ءبىر ايعا نەمەسە ودان دا كوپ ۋاقىتقا سوزىلار، وندا گەلي نارىعىندا جاھاندىق تاپشىلىق بولادى" دەگەندى ايتادى.

"گەلي ءوندىرىسى شىنىمەن قيىن جاعدايعا قالدى. بار ماسەلە كاتاردىڭ وسى گاز ءتۇرىن وندىرەتىن ءىرى ءوندىرۋشى ەكەنىندە بولىپ وتىر. ەندى شيكىزاتتى جەتكىزۋ بىردەن توقتاپ قالدى", - دەيدى ول.

ەسكەرەتىن جايت، گەليدىڭ ءىرى وندىرۋشىلەرىنىڭ ءبىرى اقش ەلىندە قور ازايىپ جاتىر. سەبەبى سۇرانىس ارتا تۇسكەن. ءتىپتى بۇل ەلدىڭ ءوزى كاتاردان سۇيىق گازدى يمپورتتاي باستاعان. سونداي-اق، گەليدى ءىرى كولەمدە وندىرەتىن ەلدەر قاتارىندا رەسەي، الجير، كانادا، قىتاي بار.

بۇدان بولەك گەلي ەكسپورتتايتىن جاپونيا سۇيىق گازدىڭ ءبىر ايعا جەتەتىن عانا قورى قالعانىن مالىمدەدى. ال نەمىستىڭ Linde ترانسۇلتتىق حيميالىق كومپانياسى تۇتىنۋشىلارىن گەليمەن قامتاماسىز ەتۋدىڭ باسقا جولدارىن قاراستىرىپ جاتىر.

ايتا كەتەيىك، بۇدان بۇرىن بىرىككەن اراب امىرلىگى، باحرەين، ەگيپەت جانە ساۋد ارابياسى كاتارمەن اراداعى ديپلوماتيالىق قاتىناستىڭ ۇزىلگەنىن مالىمدەگەن. ولاردىڭ ايتۋىنشا، كاتار لاڭكەستىك، ەكسترەميستىك جانە كونفەسسياارالىق توپتاردى قولداپ، قارجىلاندىرىپ وتىر.  سوندىقتان دوحامەن اراداعى ديپلوماتيالىق ميسسيا جانە ديپلوماتيالىق قىزمەت كورسەتۋ توقتاعان. ەندى تەڭىز، اۋە قاتىناستارىن توقتاتپاق.

“The Qazaq Times”