Foto: vestifinance.ru

Älemde geliy öndirisi boyınşa ekinşi orınğa ie Katar inertti gaz öndiretin käsiporındardıñ öndirisin toqtatuğa mäjbür boldı. Bwğan körşi elderdiñ ekonomikalıq baykot jariyalauı sebep, dep habarlaydı Reuters aqparat agenttigi.

Katar eline älemdegi geliy öndirisiniñ 25%-ı tiesili. Eldegi öndiris käsiporındarı älemdi jılına 2 mlrd kub fut swyıq gazben qamtamasız etedi. Mısalı Qatar Petroleum memlekettik mwnay-gaz filialınıñ RasGas wyımı eldegi inertti gaz öndiretin eki birdey käsiporındı basqaratın. Alayda Reuters agenttiginiñ mälimetinşe, qazirgi kezde bwl eki zauıt ta jabılğan. Sebebi Saud Arabiyası Katarmen şekaranı japqandıqtan, geliy eksportı da toqtatılğan.

Sonday-aq, amerikalıq Kornbluth Helium Consulting filialınıñ basşısı Fil Kornblut Katardağı zauıttardıñ geliy öndirisin toqtatqanın naqtıladı. Onıñ sözinşe, bwl jağday älemdik geliy narığına äzirge äser ete qoyğan joq. Twtınuşılar narıqta bar qordı paydalanıp jatır jäne Oman nemese Doha arqılı jetkiziletin balamalı nwsqalardı paydalanuda.
Sonday-aq, Fila Kornblut "eger Katar men oğan körşi elder arasındağı qaqtığıs bir ayğa nemese odan da köp uaqıtqa sozılar, onda geliy narığında jahandıq tapşılıq boladı" degendi aytadı.

"Geliy öndirisi şınımen qiın jağdayğa qaldı. Bar mäsele Katardıñ osı gaz türin öndiretin iri öndiruşi ekeninde bolıp otır. Endi şikizattı jetkizu birden toqtap qaldı", - deydi ol.

Eskeretin jayt, geliydiñ iri öndiruşileriniñ biri AQŞ elinde qor azayıp jatır. Sebebi swranıs arta tüsken. Tipti bwl eldiñ özi Katardan swyıq gazdı importtay bastağan. Sonday-aq, geliydi iri kölemde öndiretin elder qatarında Resey, Aljir, Kanada, Qıtay bar.

Bwdan bölek geliy eksporttaytın Japoniya swyıq gazdıñ bir ayğa jetetin ğana qorı qalğanın mälimdedi. Al nemistiñ Linde transwlttıq himiyalıq kompaniyası twtınuşıların geliymen qamtamasız etudiñ basqa joldarın qarastırıp jatır.

Ayta keteyik, bwdan bwrın Birikken Arab ämirligi, Bahreyn, Egipet jäne Saud Arabiyası Katarmen aradağı diplomatiyalıq qatınastıñ üzilgenin mälimdegen. Olardıñ aytuınşa, Katar lañkestik, ekstremistik jäne konfessiyaaralıq toptardı qoldap, qarjılandırıp otır.  Sondıqtan Dohamen aradağı diplomatiyalıq missiya jäne diplomatiyalıq qızmet körsetu toqtağan. Endi teñiz, äue qatınastarın toqtatpaq.

“The Qazaq Times”