فوتو: palata.kz

سەنىمدىلىك مەدەۋ بەرەدى، ال بيزنەستەگى سەنىمنىڭ ماڭىزى زور بۇل تۋرالى «اتامەكەن» ۇكپ تورالقا توراعاسى تيمۋر قۇلىباەۆ ۇكپ ىسكەر ايەلدەرى كەڭەسىنىڭ استانادا وتكەن كونگرەسىندە ايتتى.

«قىز-كەلىنشەكتەردىڭ قىزمەتكەر رەتىندە، بيزنەس جەتەكشىسى رەتىندە ەر ازاماتتاردان ەرەكشەلىگى بار. ماسەلەن، دەرەكتەر الۋ، ەسەپتەر، بۋحگالتەرلىك نەمەسە قارجىلىق ەسەپتەۋلەر قاجەت بولسا، ونىڭ ءبارى ەڭبەكقور ايەلدەر قولىمەن جاسالادى. ايەلدەر شىن مانىندە جۇمىسقا بار ءبىلىمىن سالىپ، كاسىبي تۇرعىدا كىرىسەدى، جۇمىستى بەرىلىپ ىستەيدى. ايتا كەتەيىن، سەنىمدىلىك مەدەۋ بەرەدى، بيزنەستەگى سەنىمدىلىك – باستى قاعيدالاردىڭ ءبىرى. ەلىمىز شىعىس حالقى بولۋىنا قاراماستان  شاعىن جانە ورتا بيزنەستىڭ 42%-ىن ايەلدەر باسقارادى. بۇل رەتتە ءبىلىم مەن تاجىريبە الماسۋ ماڭىزدى...»، – دەدى تيمۋر قۇلىباەۆ.

ول ايەلدەر كاسىپكەرلىگى ۇلتتىق پالاتانىڭ ءجىتى نازارىندا بولۋى كەرەك ەكەنىن اتاپ ءوتتى.

«ىسكەر ايەلدەر كەڭەسىنىڭ كۇشى – بىرلىكتە. بۇگىندە ءار وڭىردە ىسكەر ايەلدەر كەڭەسىنىڭ وكىلدىگى بار. بۇل بۇكىل رەسپۋبليكا كاسىپكەرلەرىمەن كەرى بايلانىستىڭ بارىن ايقىندايدى. بۇكىل بيزنەس ءۇشىن، ونىڭ ىشىندە ايەلدەر كاسىپكەرلىگى ءۇشىن قارجى قولجەتىمدىلىگى ماڭىزدى. بۇل ماسەلەنى ميكرو نەسيەلەۋ  ۇيىمدارى ارقىلى شەشۋگە تىرىسۋدامىز»، – دەدى تيمۋر قۇلىباەۆ.

ايتا كەتەيىك، 2016 جىلى «اتامەكەن» ۇكپ 6 وڭىردە، ياعني الماتى، اقتوبە، قىزىلوردا، ماڭعىستاۋ، جامبىل، قوستاناي وبلىستارىندا شاعىن نەسيە بەرۋدىڭ پيلوتتىق جوباسىن ىسكە قوستى. شاعىن قارجى ورتالىعى كەپىلدىككە جىلجيتىن/جىلجىمايتىن مۇلىك، جەر ۋچاسكەسىن، اۆتوكولىك، اۋىل شارۋاشىلىعى تەحنيكاسى مەن جادبىعىن الدى.

نەسيە بەرۋ تۋرالى شەشىمدى بيزنەس قوعامداستىق وكىلدەرىنەن تۇراتىن وڭىرلىك كەڭەس قابىلدايدى. بۇل پيلوتتىق جوبا بۇگىندە ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋ مەملەكەتتىك باعدارلاماسىنىڭ نەگىزىنە الىندى. باعدارلاما اياسىندا 7 جىلعا 6% مولشەرلەمەمەن 18 ملن تەڭگەگە دەيىن سومادا نەسيە بەرىلۋ قولعا الىندى.

«اتامەكەن» ۇلتتىق كاسىپكەرلەر پالاتاسى مۇنىمەن قوسا «Bastau بيزنەس» جوباسىن ىسكە قوستى. بيىل جوبا اياسىندا 15 مىڭ جۇمىسسىز جانە ءوزىن-ءوزى جۇمىسپەن قامتىعان اۋىل تۇرعىندارى كاسىپكەرلىك نەگىزدەرىنە وقىتىلادى. ول ءۇشىن 80 اۋدانعا 1 ملرد 200 مىڭ تەڭگە قاراجات بولىنگەن.

"The Qazaq Times"