فوتو: tengrinews.kz

ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆانىڭ سوزىنشە، الەۋمەتتىك كومەك كورسەتۋ جۇيەسى بويىنشا اتاۋلى الەۋمەتتىك كومەك جاردەماقىسى (ااك) 2018 جىلى ورتاشا ەسەپتەگەندە 25%-عا وسەدى. بۇل تۋرالى ول ۇكىمەت وتىرىسىندا مالىمدەدى، دەپ حابارلايدى مينسترلىكتىڭ ءباسپاسوز قىزمەتى. 

"جاڭا سيپاتتاعى ااك جۇيەسى ارقىلى اتاۋلى الەۋمەتتىك كومەكتى كۇشەيتۋ، جاردەماقى مولشەرىن كوبەيتۋ جانە ونى تاعايىنداۋ ءىس-ارەكەتىن جەڭىلدەتۋ ماسەلەلەرى شەشىمىن تاباتىن بولادى", - دەپ اتاپ ءوتتى مينيستر.

جاڭعىرتىلعان كەيىپتەگى ااك بۇگىندە كوپبالالى جانە از قامتىلعان وتباسىلارعا بەرىلەتىن ءۇش جاردەماقىنىڭ ورنىن باسادى. ياعني ازاماتتىڭ كىرىسىنە قاراماستان تاعايىندالاتىن ارناۋلى جاردەماقى، وتباسى كىرىسىنە قاتىستى ايقىندالاتىن بالالار جاردەماقىسى جانە قازىرگى اتاۋلى الەۋمەتتىك كومەك ورتاق ارناعا توعىسادى.

 جاڭا جۇيە اياسىندا، كەدەيلىك شەگى ەڭ تومەنگى كۇنكورىس دەڭگەيىنىڭ 40%-ىنان 50%-نا جوعارىلاۋىنا بايلانىستى ۇسىنىلاتىن جاردەماقى مولشەرى ورتاشا العاندا 25%-عا ۇلعايادى. ءتيىستى قاراجات قازىنادان قاراستىرىلىپ قويعان.

اتاۋلى الەۋمەتتىك كومەككە قوسا، ءار ەڭبەككە قابىلەتتى ازاماتقا، مەملەكەت تاراپىنان كەيىننەن جۇمىسقا ورنالاستىرۋعا نەمەسە جەكە ءىسىن اشۋعا، اتالعان ماقساتتاردى نەسيەلەندىرۋگە جاردەمدەسۋ ارقىلى ءبىلىم الۋ مەن كاسىپ يگەرۋگە قولداۋ تانىتىلماق.

سونىمەن قاتار، تىڭ سيپاتتاعى ااك قاجەت قۇجاتتار كولەمىن ءۇش ەسەگە قىسقارتۋعا جانە كەرەك قاعازداردى تەك جەرگىلىكتى جۇمىسپەن قامتۋ ورتالىعىنا تابىستاۋعا مۇمكىندىك تۋعىزادى دەپ كۇتىلۋدە.

“The Qazaq Times”