فوتو: emer.gov.kz

ەكسپو قاۋىپسىزدىگىن قامتاماسىز ەتۋ ءۇشىن ەلدىڭ ءارتۇرلى وڭىرلەرىنەن جەكە قۇرامنىڭ 300 قۇتقارۋشىسى جانە 33 تەحنيكا بىرلىگى كەلدى. بۇل ءورت ءسوندىرۋ جانە اۆاريالىق-قۇتقارۋ جۇمىستارى قىزمەتىنىڭ ءورت سوندىرۋشىلەرى، جەدەل-قۇتقارۋ جاساعىنىڭ قۇتقارۋشىلارى، اپاتتار مەديتسيناسى ورتالىعى شۇعىل دەن قويۋ پسيحولوگتارى جانە بريگادالارى، تج دەپارتامەنتىنىڭ ينسپەكتورلىق قۇرامى، دەپ حابارلايدى تج كوميتەتىنىڭ ءباسپاسوز قىزمەتى. 

ال ىشكى ىستەر ءمينيسترىنىڭ ورىنباسارى يۋ.ۆ. يلين استانالىق قۇتقارۋشىلارعا كومەككە كەلگەن جەكە قۇرام مەن تەحنيكا جاعدايىنىڭ ازىرلىگىن تەكسەردى.

«سىزدەردىڭ مىندەتتەرىڭىز - بارلىق جوسپارلانعان ءىس-شارالاردىڭ ءورت قاۋىپسىزدىگىن ساپالى قامتاماسىز ەتۋ، تۋىنداعان توتەنشە جاعدايلارعا ۋاقتىلى دەن قويۋ. جۇمىستارىڭىزدىڭ ءتيىستى ۇيىمداستىرىلۋىنان مەملەكەتىمىزدىڭ ءيميدجى قالىپتاساتىن بولادى»، - دەپ نۇسقاۋ بەردى يۋ.ۆ. يلين.

حالىقارالىق ءىس-شارانىڭ قاۋىپسىزدىگىن قامتاماسىز ەتۋگە جۇمىلدىرىلعان، قر ءىىم تجك كۇشتەرى مەن قۇرالدارىنىڭ جالپى سانى 1218 ادامدى جانە 118 تەحنيكا بىرلىگىن، 8 تىكۇشاقتى قۇرايدى.

كورمە اۋماعىندا كۇن سايىن ينجەنەرلىك-ينسپەكتورلىق قۇرام كەزەكشىلىك جۇرگىزەتىن بولادى. بۇدان بولەك، كورمە كەشەنىنىڭ اۋماعىندا 3 ءورت ءسوندىرۋ تەحنيكاسىن جىنە ءورت ءسوندىرۋ قىزمەتى جەكە قۇرامىنىڭ 15 قىزمەتكەرىن ورنالاستىرۋ كوزدەلگەن.

كورمە اينالاسىندا، جاقىن ورنالاسقان ءورت ءسوندىرۋ بولىمدەرىنىڭ اۋماعىندا 11 تەحنيكا بىرلىگى جانە ءورت ءسوندىرۋ قىزمەتىنىڭ، جەدەل-قۇتقارۋ جاساعىنىڭ اپاتتار مەديتسيناسى ورتالىعىنىڭ جەكە قۇرامىنىڭ 46 ادامى ورنالاستىرىلادى.

«استانا قالاسىنىڭ جاسىل بەلدەۋىن» قوسا العاندا، استاناعا ىرگەلەس اۋماقتى ورتكە قارسى قورعاۋدى تاۋلىك بويى اقمولا، قاراعاندى جانە پاۆلودار وبلىستارى ءورت ءسوندىرۋ قىزمەتتەرىنەن تارتىلعان كۇشتەرى قامتاماسىز ەتەتىن بولادى.

 “The Qazaq Times”