كورەيا رەسپۋبليكاسىنىڭ پرەزيدەنتى ءمۇن جا-ين. فوتو: Pulse.ng.

وڭتۇستىك كورەيا مەن قىتايدىڭ «Yonhap» پەن «Xinhua» اقپارات اگەنتتىكتەرى حابارلاعان اقپاراتقا سۇيەنسەك، كەشە، 30 مامىر كۇنى وڭتۇستىك كورەيا پرەزيدەنتى ءمۇن جا-ين مەن جاپونيا پرەمەر-ءمينيسترى شينزو ابە تەلەفون ارقىلى سولتۇستىك كورەيا تاقىرىبىن كەڭەسكەن. كورەي تۇبەگى ماسەلەسى توڭىرەگىندە پىكىر الماسقان ەكى ەل باسشىلارىنىڭ پىكىرىندە ازداعان ايىرماشىلىقتار ءجۇز بەرگەن.

جاپون باس ءۋازىرى ءبىرىنشى بولىپ قوڭىراۋ شالعان بۇل رەتكى سويلەسۋ 20 مينۋتقا سوزىلعان. كورەيا پرەزيدەنتى مەديا قۇرالدارىنا بەرگەن مالىمدەمەسىندە جاپون باس ءۋازىرىنىڭ سولتۇستىك كورەيا ىسىنە قاتاڭ پوزيتسيادا ەكەنىن ايتقان. جاپونيا پرەمەر-ءمينيسترى سوزىندە: « سولتۇستىك كورەيا ەسكەرتۋدى تىڭداماي ارت-ارتىنان زىمىراندار سىناعىن جاساۋدا. بۇل ارەكەتتەرىن مۇلدە كەشىرۋگە كەلمەيدى. قازىر كەلىسسوزدەردى قايتا ورتاعا سالۋدىڭ كەزەڭى ەمەس. سولتۇستىك كورەيا بۇل جولى كەلىسسوزدى بولدىرماس ءۇشىن جاساپ وتىر»، – دەگەن پىكىرن ءبىلدىردى.

كورەيا تاراپىنىڭ مالىمدەمەسىندە، ءمۇن جا-ين پرەزيدەنت شينزو ابەنىڭ ايتقان كەيبىر پىكىرلەرىنە كەلىسىم بەرە وتىرىپ مىناداي پىكىرىن ايتقان: «ءبىز باستان-اياق كورەي تۇبەگىنىڭ تاعدىرىنا جاۋاپكەرشىلىكپەن قاراۋعا ءتيىسپىز. سانكتسيالار مەن قىسىمداردىڭ باستى ماقساتى كورەي تۇبەگىن يادروسىزداندىرىپ، سولتۇستىك كورەيانى كەلىسسوز ۇستەلىنە الىپ كەلۋ. وعان قوسا ءبىز پيوڭياڭعا (پحەنيان) ەسكەرتۋ سيگنالىن جولداپ وتىرۋعا ءتيىسپىز. سوندا عانا كحدر كەلىسسوز ۇستەلىندە ءوزىنىڭ يادرولىق باعدارلاماسىنان باس تارتاتىن بولادى»، – دەگەن.

ەڭ ماڭىزدىسى جاپون پرەمەرى ءمۇن جا-ينگە G7 ماجىلىسىندەگى سولتۇستىك كورەيا تاقىرىبى تۋرالى تالقى مازمۇنىن ايتىپ بەرگەن. الداعى كۇندەردە كورەيا پرەزيدەنتى جاپوننىڭ ارنايى وكىلىنىڭ كورەياعا كەلۋىن اسىعا كۇتپەك. ەكى ەل كحدر-نى تاقىرىپ ەتكەن، كەڭەيتىلگەن وتىرىس وتكىزۋدى جوسپارلاپ وتىر.

“The Qazaq Times”