اراب بايلارى ارىستان جەتەكتەپ جۇرە المايتىن بولدى

اراب بىرىككەن امىرلىگىنىڭ بيلىگى ارىستان، جولبارىس، قابىلان ت.ب. ءىرى مىسىق تۇقىمداس جانۋارلاردى ءۇي جانۋارى رەتىندە اسىراۋعا تيىم سالدى.

بۇل كۇندە ارابيا سىندى مۇنايلى ەلدىڭ باي تۇرعىندارىندا قابىلان، ارىستان، جولبارىس سىندى جىرتقىشتاردى اسىراۋ بەت-بەدەل مەن اتاق-ابرويدىڭ بەلگىسى ساناۋ داستۇرگە اينالعان. الايدا ەندىگى جەردە بۇنداي بايلار وسى ىستەرى ءۇشىن كوپ مولشەردەگى ايىپ پۇل تولەۋىنە تۋرا كەلەدى. ءتىپتى باس بوستاندىعىنان ايىرىلۋى دا مۇمكىن.

وسىدان بۇرىن ادامدار الەۋمەتتىك جەلىلەردەن اراب باي-باعلاندارىنىڭ ءىرى مىسىق تۇقىمداس جىرتقىشتاردى جەتەكتەپ سەيىلدەپ جۇرگەن سۋرەتتەرىن كورۋگە بولاتىن. ءتىپتى، اۆتوكولىكتىڭ ورىندىعىندا وتىرعان ارىستانداردى دا كورەتىن ەدى. قازان ايىندا دۋباي جاعاجايىندا اسىر سالعان جولبارىستىڭ ماۋلەندەرى تۇسىرىلگەن ۆيدەو الەۋمەتتىك جەلىنى شارلاپ، جەلى تۇتىنۋشىلارىنىڭ قىزىعۋشىلىعىن تۋدىرعان بولاتىن.

ارينە، ءابا-ءنىڭ بيلىگى وسى جىرتقىشتاردىڭ قوعامدىق قاۋىپسىزدىككە قاتەر توندىرۋىنەن الاڭدايدى. اتقارۋعا بەرىلگەن سوڭعى زاڭدارىنا سايكەس، «كەز-كەلگەن جەكە تۇلعانىڭ جابايى اڭداردىڭ بارلىق ءتۇرىن، جىرتقىش اڭداردى، قولعا ۇيرەتىلگەن ادام ومىرىنە قاتەر توندىرەتىن جانۋارلاردى اسىراۋعا، تاماقتاندىرۋعا بولمايدى». وسى زاڭ بويىنشا مۇنداي اڭداردى اسىراۋ تولىمدىلىعى زووپاكتەردە، جابايى حايۋاناتتار قورىعىندا، تسيرك نەمەسە زەرتتەۋ ورتالىقتارىنا عانا بەرىلگەن. ەگەر بۇل زاڭدى بۇزعان جەكە تۇلعالار انىقتالسا 6 ايعا دەيىن باس بوستاندىعىنان ايىرۋ جانە 500 مىڭ ديرحان (13,6 مىڭ اقش دوللار) ايىپ پۇل سالىنادى. ەگەر جىرتقىش جانۋارلاردى باسقالاردى قورقىتۋ ءۇشىن پايدالانىلسا ايىپ پۇلى 700 مىڭ ديرحانعا دەيىن جوعارلايدى.

"The Qazaq Times"