فوتو: Daily Express

يراك ۇكىمەتى «يسلام مەملەكەتى» ۇيىمىنىڭ ءبىر قاتار مالىمدەمەلەر توپتاماسىن تاركىلەگەن. قولعا تۇسىرگەن بۇل قۇجاتتار دالەلدەگەندەي –ەكسترەميستىك توپتاردىڭ تۇتقىندارعا جان تۇرشىگەرلىك حيميالىق ەكسپەريمەنتتەر جاساعانى بەلگىلى بولدى. بۇل تۋرالى "شينحۋا" اگەنتتىگىنىڭ رەسمي سايتى مالىمدەپ وتىر.

قازىر يراكتىڭ سولتۇستىك قالاسى موسۋل «يسلام مەملەكەتى» ۇيىمىنان تازارتىلۋدا. وتكەن جىلدى قازان ايىنان باستالعان موسۋل قورعاۋ شايقاسى سوڭعى مارەسىنە جەتۋگە از قالدى. يراك ۇكىمەتىنىڭ ارمياسى رامازان ايىنان بۇرىن موسۋلدى ەكسترەميستىك كۇشتەردەن تازارتاتىندىعىن ءمالىم ەتكەن بولاتىن.

ۇلىبريتانيا «The Times» باسىلىمىنىڭ حابارلاۋىنشا، «يسلام مەملەكەتى» ۇيىمىنىڭ ادام ەكسپەريمەنتتەرى موسۋل ۋنيۆەرسيتەتىندە تابىلعان. بۇل تۋرالى مالىمەتتەردى اقش پەن ۇلىبريتانيانىڭ اسكەري كۇشتەرى دە راستاپ وتىر. تابىلعان قۇجاتتارعا قاراعاندا، اتالمىش ۇيىمنىڭ ادامدارعا جاساعان اياۋسىز سىناقتارىنىڭ ءتۇرى كوپ. سونىڭ بىرىندە ءبىر ەر ادامنىڭ ازىقتىق پەن اۋىز سۋى رەتىندە تولىقتاي تاللي سۋلفاتىن قابىلداتۋ سىناعىن جاساعان. تەكسەرۋ ناتيجەسىنىڭ ەستەلىگى بويىنشا، ەكى كۇننەن كەيىن بۇل جابىرلەنۋشى بەزگەك اۋىرۋىنا ۇشىراعان، ودان ارى قاراي اسقازان مەن ميدا ءىسىنۋ پايدا بولعان، ون كۇننەن كەيىن ايانىشتى حالدە كوز جۇمعان.

نيكوتين جوعارى دوزادا بەرۋ ارقىلى جاساعان سىناقتارى دا ايانىشتى ناتيجەلەردى كورسەتكەن. ۇيىمنىڭ سىناق جاساۋشىلارى وسىنىڭ ءبارىن تەكسەرۋ ەستەلىگىنە «تابىستى بولدى» دەپ جازعانى بايقالادى. ولاردىڭ مۇنداي جان تۇرشىگەرلىك سىناقتارىنىڭ ناقتى ماقساتى ءالى دە انىقتالۋ ۇستىندە.

سوڭعى كەزدەرى، «يسلام مەملەكەتى» ۇيىمى حيميالىق قارۋ پايدالاندى دەگەن دە اقپاراتتار بار. سۇرياداعى ۋلى گاز پايدالانۋ، يراك ۇكىمەت كۇشتەرىنە قارسى حلورلى قارۋ پايدالانۋ ت.ب. رەسەي جاق «يسلام مەملەكەتى» ۇيىمى موسۋل ۋنيۆەرسيتەتىن حيميالىق قارۋ زەرتتەپ-جاساۋ بازاسى ەتكەن دەپ كورسەتتى.

“The Qazaq Times”