كورەيانىڭ جاڭا پرەزيدەنتى قىتاي باسشىسىنا ەلشى جىبەردى

قىتاي باسشىسى شي جينپيڭ وڭتۇستىك كورەيانىڭ باس ەلشىسى لي حايچانمەن كەزدەسۋ بارىسىندا، ەكى ەل قارىم-قاتىناسىنا تۇسكەن سىزاتتاردى قايتا قالپىنا كەلتىرەتىندەرىن ايتتى. كورەيا پرەزيدەنتى ءمۇن جاە-ين وسىدان بۇرىن قىتايمەن تىعىز قارىم-قاتىناس ورناتۋعا ۇمىتكەر ەكەنىن ايتقان بولاتىن. قىتاي مەن كورەيا اراسىندا اقش-تىڭ «ساد» زىمىرانعا قارسى جۇيەسىن ورناتۋىنا بايلانىستى شيەلەنىستى جاعداي ورناعان بولاتىن.

“The Wall Street Journal” باسىلىمىنىڭ حابارلاۋىنا قاراعاندا، كورەيانىڭ سىرتقى ىستەر مينيسترلىگىنىڭ رەسمي وكىلى بۇل رەتكى كەزدەسۋ تۋرالى تۇسىنىكتەمە بەرۋدەن باس تارتقان. بىراق، قىتاي باسشىسى مەن سول ەلدەگى كورەيانىڭ ەڭ جوعارى ەلشىسىنىڭ كەزدەسۋى ەكى ەل اراسىنداعى قارىم-قاتىناستى جاقسارتۋ ماقساتىندا بولىپ وتكەنىن بولجاۋعا بولادى.

قىتاي باسشىسى بەيجىڭدەگى «حالىق سارايى» قابىلداۋ ۇيىندە ءمۇن جاە-ءيننىڭ ارناۋلى وكىلىن جىلى لەبىزبەن قارسى الدى. سونىمەن بىرگە، ەكى ەل اراسىنداعى قارىم-قاتىناستى قالپىنا كەلتىرۋگە دايىن ەكەنىن ايتتى. شي جينپيڭ ەكى ەل قاتىناسىن مۇمكىندىگىنشە تەزىرەك قالپىنا كەلتىرۋ كەرەك دەپ اتاپ كورسەتتى. دەگەنمەن، كەزدەسۋدەن كەيىن بۇل تۋرالى ءباسپاسوز ءماجىلىسى وتكىزىلمەگەن.

لي حايچان سول كۇنى قحر مەملەكەتتىك كەڭەسشىسىمەن دە كەزدەسكەن. قىتاي جوعارى لاۋازىمدىلارىنىڭ ايتۋىنشا، قىتاي مەملەكەتتىك كەڭەسشىسى كورەي ەلشىسىنە جاڭا باسشىلارىنىڭ ەكى ەل اراسىندا الاۋىزدىققا الىپ بارعالى تۇرعان «ساد» زىمىرانعا قارسى جۇيەسىنە بايسالدىلىق تانىتىپ، دۇرىس شەشىم قابىلداۋىن ءۇمىت ەتەتىنىن ايتقان.

ال سولتۇستىك كورەيا ماسەلەسىنە كەلگەندە قىتاي باسشىلارى ءبىر اۋىزدان: قىتاي سولتۇستىك كورەيانىڭ يادروسىزدانۋىن قولداپ، كورەي تۇبەگى قايشىلىعىنىڭ بەيبىت جولمەن شەشىم تابۋىن ءۇمىت ەتەدى دەپ كورسەتكەن.

"The Qazaq Times"