داۋرەن اباەۆ ازەربايجان بانكىندەگى زەينەتاقى اكتيۆتەرىنە قاتىستى پىكىر ءبىلدىردى

ازەربايجاننىڭ بانكروت بولعان حالىقارالىق بانكىنە سالىنعان قازاقستاندىقتاردىڭ زەينەتاقى جيناقتارىنا مەملەكەتتىك كەپىلدىك بار. بۇل تۋرالى قر اقپارات جانە كوممۋنيكاتسيالار ءمينيسترى داۋرەن اباەۆ مالىمدەدى.

«قازىرگى تاڭدا تەكسەرۋ جۇمىستارى جۇرگىزىلىپ جاتىر. بارلىق اقپارات جاريالانادى. قازاقستاندا زەينەتاقى جيناقتارىنا مەملەكەتتىك كەپىلدىك بار، ونى ەشكىم الىپ تاستاعان جوق. ول ءتىپتى ينفلياتسيانى ەسەپكە الادى. سوندىقتان زەينەتاقى الاتىن بارلىق ازاماتتار ونى الادى. وعان ەشبىر كۇمان جوق، ەشكىم ۋايىمداماسا بولادى»، - دەدى ۆەدومستۆو باسشىسى حابار اگەنتتىگىنىڭ "اشىق ديالوگ" جوباسى اياسىندا.

سونداي-اق، داۋرەن اباەۆ ينۆەستيتسيانىڭ مۇنداي ءتۇرىنىڭ دۇرىس-دۇرىس ەمەستىگى تەۋسەرۋ كەزىندە انىقتالاتىنىن اتاپ ءوتتى.

«وزدەرىڭىز ايتىپ وتىرسىزدار «قارجى دۇرىس جولمەن سالىنعان با؟» دەپ. بۇل ماسەلە ەرەكشە باقىلاۋدا، قاجەتتى تەكسەرۋلەر جۇرگىزىلىپ جاتىر»، - دەدى اباەۆ.

ايتا كەتەيىك، وسىعان دەيىن بجزق-نىڭ 71,3 ملرد تەڭگەسى نەمەسە 200 ملن دوللار ازەربايجان حالىقارالىق بانكىنىڭ وبليگاتسيالارى ءۇشىن سالىنعانىن ايتقان بولاتىنبىز. Bloomberg اگەنتتىگىنىڭ مالىمەتىنشە، ازەربايجاننىڭ حالىقارالىق بانكى ەلدەگى ۆاليۋتالىق داعدارىس پەن ۆاليۋتانىڭ جەتىسپەۋشىلىگىنە بايلانىستى سىرتقى قارىزدارىن تولەۋدى توقتاتقان جانە كرەديت بەرۋشىلەرمەن كەلىسسوز جۇرگىزۋدى باستايدى.

وسىدان سوڭ ازەربايجان بيلىگى پروبلەمالى بانككە سالىنعان قازاقستاندىق زەينەتاقى قارجىسى قايتارىلاتىنىن مالىمدەگەن. قارىز ۇلتتىق قور قاراجاتىنان قايتارىلۋى مۇمكىن. سوندىقتان مينيستر «حالىقارالىق بانككە اقشا سالعان بجزق-عا دا ، باسقا دا كومپانيالارعا دا تونەتىن ەش قاۋىپ جوق» دەپ وتىر.

“The Qazaq Times”