فوتو: راديو ازاتتىك

وسىدان بىرنەشە اي بۇرىن ليتسەنزياسىنان ايىرىلعان قازينۆەستبانكتە زەينەتاقى قورىنىڭ ءالى دە 1 ملرد 449 ملن تەڭگەسى بار. سالىم 2019 جىلدىڭ 21 قازانىندا الىنۋى ءتيىس ەكەن. وسى جىلدىڭ 1 ساۋىرىندەگى اقپارات بويىنشا قازينۆەستبانكتىڭ دەپوزيتىندە 1 ملرد 491 ملن تەڭگە ورنالاسقان، ال وتكەن جىلدىڭ قاڭتار ايىندا بۇل قارجى 2,9 ملرد تەڭگە بولعان. مۇنداي مالىمەتتى Kapital.kz سايتى كەلتىرىپ وتىر. 

قازينۆەستبانكتىڭ بانكروت بولعانى جونىندەگى سوتتىڭ قاشان بولاتىنى ازىرگە بەلگىسىز. بجزق بولسا بۇعان دەيىن قازينۆەستبانك دەپوزيتىنە  2,9 ملرد تەڭگە مەملەكەتتىك باعدارلاما اياسىندا سالىنعانىن ايتادى.

«ۇلتتىق قوردىڭ باسقارۋ جونىندەگى كەڭەسى 200 ملرد تەڭگە ورتا جانە شاعىن بيزنەستى قولداۋ ءۇشىن بانكتەردى قارجىلاندىرۋعا جۇمسالاتىنىن ناقتىلاعان. 35 بانكتىڭ 30-ىن وسى جۇيەگە قاتىسۋعا شاقىردىق. قارجىنى ءبولۋ شارتى بانكتەردىڭ رەيتينگىنە قاراي 14−16,5% شاماسىندا بولدى. كرەديتتەۋ 3,5 جىلعا ەسەپتەلگەن. 6 بانككە 6 اي ىشىندە قارجىنى يگەرۋگە بەردىك", - دەپ تۇسىندىرەدى ۇلتتىق بانكتىڭ مونەتارلى وپەراتسيالار جونىندەگى دەپارتامەنتى ديرەكتورىنىڭ ورىنباسارى نۇرجان تۇرسىنحانوۆ.

سونداي-اق، ول بولىنگەن قارجىعا مونيتورينگ جۇرگىزۋ ءۇشىن "دامۋ" قورى شاقىرىلعانىن ايتادى. ياعني بجزق اتاپ وتكەندەي، 2016 جىلعى 200 ملرد تەڭگەنىڭ 113 ميللياردى 15 بانكتى قارجىلاندىرۋعا جۇمسالعان.

"تاعى ايتامىن، 200 ملرد تەڭگەگە قاتىستى باعدارلاما ۇكىمەتتىك. بانكتەر ارقىلى وسى قارجىمەن ورتا جانە شاعىن بيزنەستى قارجىلاندىرۋ جوسپارلانعان", - دەگەن نۇرجان تۇرسىنحانوۆ.

ال بجزق بولسا قازينۆەستبانككە بەرىلگەن بارلىق قارجى يگەرىلگەن دەيدى. "زەينەتاقى قورى دامۋدان مالىمەت الدى. 1 قازاندا قازينۆەستبانككە بولىنگەن 2,9 ملرد تەڭگە كولەمىندەگى قارجىنىڭ 99,9%-ى بانك تاراپىنان يگەرىلگەن. ياعني 2016 جىلدىڭ 21 ساۋىرىندە بانككە ورنالاستىرعان ءبىزدىڭ قارجى تولىعىمەن ورتا جانە شاعىن بيزنەسكە جۇمسالعان. سوندىقتان ءبىز قارجىنى الا المادىق، سەبەبى قارجى ەكونوميكانىڭ  ناقتى سەكتورىنا باعىتتالدى»، — دەپ اتاپ ءوتتى قور وكىلدەرى.

ەندى قورداعىلار ەگەر بانك  بانكروت رەتىندە تانىلسا، وندا  2,9 ملرد تەڭگە وتەلەدى دەپ وتىر.

“The Qazaq Times”