امەريكالىق باق: ترامپ رەسەي وكىلىنە اقش-تىڭ قۇپيالىعىن جايىپ سالدى

پرەزيدەنت ترامپتىڭ تاعى ءبىر لاڭى اقش اقپارات قۇرالدارىن دۇرلىكتىرىپ تۇر. امەريكاندىق باق ترامپ رەسەيلىك جوعارى لاۋازىممەن كەزدەسۋدە اسا ماڭىزدى قۇپيالىقتى اشىپ تاستادى دەپ ايىپتاۋدا. بۇل ماسەلە تۋراسىندا اقۇي دۇيسەنبى كۇنى ارناۋلى ءباسپاسوز ءماجىلىسىن وتكىزدى.

«ۋاشينگتون پوست» (Washington Post) باسىلىمىنىڭ حابارلاۋىنشا، ترامپ وتكەن اپتانىڭ سارسەنبى كۇنى، اقۇيدەگى پرەزيدەنت كەڭسەسىندە رەسەيدىڭ جوعارى لاۋازىمدى وكىلىن قابىلداۋ كەزىندە اقش-تىڭ ماڭىزدى بولعان قۇپيالىعىن ورتاعا سالعان. اتالعان باسىلىمنىڭ كورسەتۋىندە بۇل قۇپيالىق «يسلام مەملەكەتى» (Islamic State) تەررورلىق ۇيىمىنا قارسى تۇرۋ جونىندەگى قۇپيالىق ەكەن. اقش-تىڭ ۇلتتىق قاۋىپسىزدىك جونىندەگى كەڭەسشىسى توم بوسسەرت ورتالىق بارلاۋ باسقارماسىنا جانە اقش مەملەكەتتىك قاۋىپسىزدىك كوميتەتىنە ترامپتىڭ كەزدەسۋدەگى سوزدەرىنە قايتالاي تەكسەرۋ جۇرگىزۋدى الدا بۇرىن  تاپسىرعان.

تانىمال “The Wall Street Journal” باسىلىمىنىڭ حابارلاۋىنا قاراعاندا، ۇلتتىق قاۋىپسىزدىك جونىندەگى كەڭەسشى H.R. McMaster دۇيسەنبى كۇنى كەشتە اقۇيدە جۋرناليستەردى قابىلداپ، «ۋاشينگتون پوست» جاريالاعان اقپاراتتى تەرىستەدى. ونىڭ تۇسىندىرۋىنە قاراعاندا، ول پرەزيدەنت ترامپ پەن رەسەي ءسىم باسشىسىنىڭ كەزدەسۋ بارىسىن ءوز كوزىمەن كورگەن. الايدا، «ۋاشينگتون پوست» جاريالاعانداي ينفورماتورلار  تۋرالى قۇپيالىق ايتىلماعان. وعان قوسا ترامپ جاريالانباعان ەشقانداي اسكەري قۇپيالىقتى دا اشىپ كورسەتكەن جوق دەپ اقتادى.

دەسە دە، «ۋاشينگتون پوست» باسىلىمىندا ترامپ اقپارشىلار (ينفورماتورلار) تۋرالى قۇپيالىقتى جايىپ سالدى دەپ جازىلماعان. تەك اقپارشىلارعا قاتەر توندىرەتىن قۇپيالىقتى اشىپ قويدى دەلىنگەن. ال، دۇيسەنبى كۇنى “The New York Times” باسىلىمىندا دا وسىعان ۇقساس اقپارات جاريا بولدى.

كەشە، «ۋاشينگتون پوست» باسىلىمى اتالعان حاباردى جاريالاي سالىسىمەن، ءبىر ساعات وتپەي جاتىپ، اقۇي اقش مەملەكەتتىك حاتشىسى تيللەرسوننىڭ تۇسىنىكتەمەسى حابارلاندى. وندا كورسەتىلۋىنشە سەرگەي لاۆروۆقا كەزدەسكەن ترامپ اقپارشىلار تۋرالى ەمەس، تەررورلىق ۇيىمعا بىرگە قارسى تۇرۋ تۋرالى كەڭەستى دەلىنگەن.

“The Qazaq Times”