ء"بىر بەلدەۋ، ءبىر جول" حالىقارالىق فورۋمىنا قاتىسقان ەل باسشىلارى. فوتو: "Xinhua.net

قىتاي استاناسى بەيجىڭدە 14 مامىر كۇنى «ءبىر بەلدەۋ، ءبىر جول» (一带一路/ One Belt, One Road) حالىقارالىق ىنتىماقتاستىق فورۋمى» اشىلۋ سالتى بولىپ ءوتتى. قىتاي باسشىسى شي جينپيڭ الەمنىڭ ءار ەلىنەن كەلگەن مەملەكەت باسشىلارىن جەكە-جەكە قابىلدادى. قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ تا بەيجىڭگە  ساپارلاي بارىپ، قىتاي باسشىسىمەن كەزدەسۋ وتىرىسىندا بولدى.

«شينحۋا» اگەنتتىگىنىڭ حابارلاۋىنشا، اتالعان فورۋمعا الەمنىڭ 29 ەلىنەن مەملەكەت باسشىلارى كەلىپ قاتىستى. وعان قوسا 130 ەلدەن 1500 دەلەگات قاتىستى. فورۋمنىڭ اشىلۋ ءسوزىن سويلەگەن قىتاي باسشىسى «ءبىر بەلدەۋ، ءبىر جول» باعدارلاماسىنىڭ «ەۋرازيا ەكونوميكالىق وداعى»، «ورتالىق كوريدور» قاتارلى كوپ ەلدىڭ ورتاعا قويعان ەكونوميكالىق جوبالارىنا سايكەس كەلەتىنىن اتاپ ءوتتى. سونداي-اق، بايىرعى جىبەك جولىنىڭ ەرتە، ورتا عاسىرلارداعى دۇنيە ءۇشىن ماڭىزدىلىعىنا توقتالا كەلىپ، جاڭا زاماندا دا جىبەك جولىن جاڭعىرتاتىن «ءبىر بەلدەۋ، ءبىر جول» باعدارلاماسىنىڭ ازيا، ەۋروپا، افريكا ءتىپتى تىنىق مۇحيت ەلدەرى ەكونوميكاسىندا تۇتاستىراتىنىن ايتىپ ءوتتى.

پرەزيدەنت نۇرسۇلتان نازارباەۆ قىتاي باسشىسىمەن كەزدەستى. فوتو: Xinhua.net

14 مامىر كۇنى، اتالعان فورۋمعا قاتىسۋ ءۇشىن پرەزيدەنتى نۇرسۇلتان نازارباەۆ باستاعان قازاقستان رەسپۋبليكاسىنىڭ دەلەگاتتارى شي جينپيڭ جانە قىتاي ۇكىمەتىنىڭ جوعارى لاۋازىمدىلارىمەن كەزدەستى. ارنايى كەزدەسۋ وتىرىسى بەيجىڭدەگى «حالىق سارايىندا» بولىپ ءوتتى.

“The Qazaq Times”