فوتو: ريا نوۆوستي/الەكسەي مالگاۆكو

رەسەيدە تۇرمىسى تومەن تۇرعىندار ءۇشىن ازىق-تۇلىك ساتىپ الۋعا كومەك بەرەتىن باعدارلاما جۇزەگە اسايىن دەپ جاتىر. رەسپۋبليكا بۇل جوبانى وسى جىلى ەنگىزبەك بولعان. ەندى 2018 جىلدان باستاپ جۇزەگە اسىرىلماقشى. رەسەيدىڭ ءوندىرىس جانە ساۋدا ءمينيسترى دەنيس مانتۋروۆتىڭ سوزىنشە، باعدارلاما 2019 جىلعا قاراي تولىق كۇشىنە ەنەتىن بولادى. ال قارجى مينيسترلىگى بولسا، بۇنى ەكونوميكا مەن بيۋدجەت ءۇشىن ءتيىمدى باعدارلاما رەتىندە ماقۇلداعان.

سونىمەن باعدارلاما بويىنشا "ازىق تۇلىك كارتاسى" نەمەسە "ازىق-تۇلىك سەرتيفيكاتى"  تاراتىلىپ، وسى ارقىلى از قامتىلعان رەسەيلىكتەر ەت بالىق، كوكونىستەردى ساتىپ الادى.

ارنايى بەكىتىلگەن ازىق-تۇلىك قۇرامىندا اراق-شاراپ پەن تەمەكىدەن باسقاسىنىڭ ءبارى بولادى. ياعني ارنايى تىزىمگە كارتوپ، ەت، جەمىس-جيدەك، ءسۇت ونىمدەرى، ءتىپتى كوشەتتەر، تۇقىمدار مەن ءۇي جانۋارلارىنا ارنالعان جەم كىرەدى.

قويىلاتىن باستى شارت: باعدارلاما ارقىلى تەك رەسەيلىك وندىرۋشىلەردىڭ ونىمدەرى ساتىپ الىنادى.

بۇل جۇيە رەسەيدىڭ تولەم قۇرالدارىنىڭ ءبىرى "مير" بانكتىك كارتاسىمەن جۇزەگە اسىرىلادى. پلاستيكالىق كارتاعا اي سايىن "ەكۆيۆالەنتتى قارجى" نەمەسە "بالل", ياعني قارجى اۋدارىلادى. بالدىق جۇيە دەپ ايتۋعا بولادى. بىراق جيناق ەمەس. ياعني اي سايىن اۋدارىلعان بالل كارتادا جيناقتالىپ قالمايدى. ول اي سايىن تاعايىندالعان ازىق-تۇلىك تىزبەسى بويىنشا جۇمسالىپ وتىرۋ كەرەك.

سونداي-اق، ازىق-تۇلىك ءۇشىن اۋدارىلعان قارجىنى بانكومات ارقىلى قولما قول اقشاعا اينالدىرۋعا بولمايدى. "باعدارلاما بويىنشا كارتاداعى قاراجات قاجەتتى زاتتاردى ساتىپ الۋعا جەتكىلىكتى بولاتىنداي ەسەپتەلگەن. ەگەر قارجى جۇمسالماسا كەلەسى ايعا جارامسىز بولادى", - دەپ تۇسىندىرەدى مانتۋروۆ.

جوبانى جاساپ شىعارعاندار بۇل حالىقتىڭ الەۋمەتتىك ءالسىز توبىنىڭ نەگىزگى ماسەلەلەرىن شەشۋگە جانە وتاندىق وندىرۋشىلەردىڭ تاۋارلارىنا سۇرانىستىڭ ارتۋىنا كومەكتەسەدى دەيدى.

ازىرگە بۇل باعدارلاما قايدان قالاي قارجىلاناتىنى بەلگىسىز. دەنيس مانتۋروۆتىڭ سوزىنشە، بارلىعى بيۋدجەتكە بايلانىستى بولعاندىقتان، قازىر قارجىلاندىرۋ كوزدەرى قاراستىرىلىپ جاتىر.

 “The Qazaq Times”