اقش ناتو-نى قولداۋىن كۇشەيتىپ، رەسەيگە قىسىم تۇسىرمەك

اقش قورعانىس دەپارتامەنتىنىڭ حابارلاۋىنشا، رەسەيدەگى كەڭ اۋقىمدى اسكەري وقۋ-جاتتىعۋلاردىڭ الدىندا قۇراما شتات بالتىق ايماعىنداعى رەسەيلىك اسكەري قورعانىس قۋاتىن باقىلاۋدى ارتتىرادى. بۇل تۋرالى “The Wall Street Journal” باسىلىمى حابارلاپ وتىر.

اتالعان دەپارتامەنتتىڭ لاۋازىمدىلارىنىڭ ايتۋىنشا، اقش قورعانىش دەپارتامەنتى تەرگەۋ-تەكسەرۋ پارمەنىن ارتتىرۋدا. بۇل تەكسەرۋ رەسەيدەگى قىركۇيەك ايىندا بولاتىن اسكەري وقۋ جاتتىعۋلاردى، سونداي-اق، بالتىق تەڭىزىندەگى اسكەري فلوتىن دا ءوز ىشىنە قامتيدى. بۇل باقىلاۋ مىندەتىن ناتو-نىڭ اۋە قورعانىس شارلاۋ ءبولىمى ءوز موينىنا الادى. اقۇي وكىلدەرىنىڭ ايتۋىنشا اتاعان ايماققا زىمىرانعا قارسى جاڭا جۇيە ورناتىلۋى دا مۇمكىن ەكەن.

قورعانىس دەپارتامەنتىنىڭ ايتۋىنا قاراعاندا، رەسەي “Zapad” اسكەري وقۋ-جاتتىعۋىندا ەڭ سوڭعى ۇلگىدەگى وزىق اسكەري تەحنيكالار تارتىلادى دەپ كۇتىلۋدە. بۇل اقش جاقتىڭ بارلاۋ تەكسەرۋىنە ۇلكەن وراي بولماق ەكەن. رەسەي جاق ايماقتاعى اسكەري تەحنيكالاردى جاڭارتىپ الداعى وقۋ جاتتىعۋعا پايدالانادى. كەيبىر وزىق سوعىس تەحنيكالارى جاتتىعۋدان كەيىن قولدانۋدان شىعارىپ تاستاۋى دا مۇمكىن.

اقش قورعانىس ءمينيسترى مەتيسس (Jim Mattis) سارسەنبى كۇنى ليتۆا پرەزيدەنتى مەن بىرگە ۆيلنيۋستە بولدى. بۇدان كەيىن بەلگىلى بولعانى – اقش ناتو-نىڭ اسكەري قورعانىس قۋاتىن قولداۋ ءۇشىن اتالعان ايماقتا كەمەلدى قورعانىس جۇيەسىن ورناتۋى مۇمكىن. دەسە دە بۇل لاۋازىمدىلار بۇل تۋرالى ناقتى مالىمەت بىلدىرمەدى. اقش-تىڭ ناتو-نى قولداۋى كۇشەيگەن سايىن رەسەيگە قىسىم تۇسەتىنى انىق. اسىرەسە، بالتىق ايماعىندا زىمىرانعا قارسى جۇيە ورناتىلاتىن بولسا، وندا، رەسەيدىڭ قورعانىس قاۋىپسىزدىگى جاڭا سىنعا ءدوپ كەلەدى. دەمەك الداعى ۋاقىتتا ناتو مەن رەسەي اراسىنداعى تەكە-تىرەس كۇشەيە تۇسەدى دەگەن ءسوز.

"The Qazaq Times"