فرانتسياداعى سايلاۋدىڭ شەشۋشى تۋرى جاقىندادى. ۇمىتكەرلەر سوزىنەن تايىپ كەتتى

فرانتسيا پرەزيدەنت سايلاۋىنا نەگىزگى ۇمىتكەرلەردىڭ ۇستانىمدارى وزگرە باستادى. وسى اپتانىڭ سوڭىندا بولاتىن پرەزيدەنت سايلاۋى جاقىنداعاندا ەڭ نەگىزگى پرەزيدەنتكە ۇمىتكەر تۇلعالار ءوز ۇستانىمدارىنان تايقىپ كەتكەن. بۇل تۋرالى «اناتولى» اقپاراتتىق اگەنتتىگى حابارلاپ وتىر.

فرانتسيا دەموكراتيالىق پرەزيدەنت سايلاۋىنىڭ العاشقى تۋرىندا ەممانۋەل ماكرون مەن مارين لە پەننىڭ جوعارى داۋىس جيناپ، كەلەسى تۋرعا وتكەنى بەلگىلى. وسىعان دەيىن ماكرون فرانتسيانىڭ ەۋروپالىق وداق قۇرامىندا بولۋىن جاقتاپ كەلگەن ەدى. ال مارين لە پەن بولسا «ۇلتتىق مايدان» پارتياسىنىڭ وكىلى رەتىندە ەو-دان باس تارتۋدى ۇرانداعان بولاتىن. الايدا، سايلاۋدىڭ شەشۋشى تۋرىنا ءبىر اپتا ۋاقىت قالعاندا، ەكى كانديداتتىڭ ۇستانىمدارى الماسىپ كەتتى.

ماكرون ەو-نىڭ قازىرگى قاۋقارسىز كۇيىن كوبىرەك تىلگە تيەك ەتىپ، بولاشاقتا جالعاسىم تابا المايدى دەدى. وداقتىڭ قارجى-ەكونوميكالىق قۇرىلىمدارىن قايتا رەتتەۋى كەرەك ەكەنىن ايتىپ، ەۋرووداققا ءتان دەپ تاپقان كەمشىلىكتەردى ايتا باستادى.

وسىعان دەيىن فرانتسيا ءۇشىن ەۋرووداقتىڭ ەش قاجەتى جوق دەگەن ۇستانىمداعى مارين لە پەن ورتاق ۆاليۋتانىڭ فرانتسۋزدىڭ ترانسۇلتتىق كومپانيالارى جاعىنان قولدانۋىن قۋاتتاپ، ەل ىشىندە ۇلتتىق ۆاليۋتانى قولدانۋدى جۇزەگە اسىرعان ءجون دەگەن پىكىرىن ءبىلدىردى. دەسسە دە فرانتسيانىڭ ەو-دان باس تارتۋ شەشىمىن حالىقتىق رەفەرەندۋمعا سالۋ كەرەك دەپ وتىر.

فرانتسيا سايلاۋىنىڭ شەشۋشى تۋرى 7 مامىردا بولادى. شەشۋشى تۋردىڭ جەڭىمپازى كىم بولاتىنىن ناقتى بولجاۋشىلار بولماسا دا، ەممانۋەل ماكرونعا باسىم كوپ ادام قولداۋشى بولىپ وتىر.

“The Qazaq Times”